Friday, September 19, 2008

金融火場的黑色幽默

孫柏文作為一個報紙嘅財經口水佬,今時今日嘅大勢好難落筆寫。由我落筆到你睇到嘅一刻,分分鐘已經24小時。唔好話24小時,你問完我點睇之後24分鐘,我嘅答案可能已經變晒,事件發生速度就係咁快。

世界雖然好似木屋區大火咁,事態不斷變同笠笠亂,不過喺呢場火災中就有班友勁搞爛gag。

佢哋係乜水?咪就係班財經博客。寫blog好多時嘅運作,就係有新聞,跟住博客畀反應。以下就係幾個黑色幽默例子。

如木屋區大火笠笠亂

新聞:禮拜日,前聯儲局主席格林斯潘上電視,講話今次呢場金融危機係百年一遇。
博客反應:縱火者分析火勢。

新聞:Bear Stearns在3月被救,8月雷曼就要執笠,不過兩日後又出手借850億畀AIG。政策上有出入。
博客反應:雷曼就係一個鍾意走去隻狗度,跟住大力拉狗尾嘅小朋友。今次拉咗隻大狼狗嘅尾,所以被咬死,冇人救。

Bear Stearns就係一個好鍾意煲蠟,家住高樓大廈嘅小朋友。今次玩出火,焚毀屋企,要派消防車救火,為免波及鄰居。

AIG就係一個誤打誤撞,撞入一間生化武器實驗室裏面嘅小朋友。將啲睇唔明標籤嘅試管袋晒落袋,跟住同其他小朋友玩。

新聞:多間銀行被國有化。
博客反應:花旗國已變成97年嘅印尼,最大嘅銀行全部國有化。變成高增長嘅發展中國家。

銀行體制健全成笑話


新聞:雷曼冇國有化,佢之前借咗好多錢畀商業大廈發展商起商廈。
博客反應:仲大鑊!花旗國就快變成97年嘅泰國,一棟又一棟,被棄置嘅摩天鬼樓。

當然,最黑色幽默嘅言論,根本唔使反應都已經好黑色。

新聞:花旗國財長話:「銀行體制非常健全。」

5 comments:

  1. 昨日睇無記見到你,下次上無記記住上來講聲,一定錄低唔好錯過!

    昨日全世界出手托市,香港用左15億,其他阿爺出手,15億都抵出,一定阿爺驚左柏文兄發癲狂鬧,哈哈~不過我又諗點解托市,正如你所說,有錢佬最好玩大玩到累街坊,政府就會自然包底,好多人都話咁托法都係幫有錢人唔洗破產,但我覺得最終係政府幫自己,因為係政府話所有打工仔都要供MPF,唔少無危機感嘅人,因為前年大升市,MPF都係改到高風險,如果全世界股市仲不斷跌,真係乜都冇得剩!到時仲點退休?

    ReplyDelete
  2. 美國政府將垃圾攬哂上身, 咁者係次按將會完全解決(轉移)? 但係堆垃圾應該點都唔值錢, 將來會賣得出咩?

    唉, 本來覺得冧檔係對佢地玩漏洞既制裁, 而家佢地逍遙法外, that's just so unfair....

    ReplyDelete
  3. pakman,

    Your readers are really wise people!

    ReplyDelete