Monday, September 29, 2008

東亞擠提 警方應拉誰

孫柏文放假一個禮拜,世界真係好多事發生。最令人注目,當然係花旗國政府嘅 7000億美元買垃圾方案。由原本我走嘅時候,呢個救市方案被視為黑暗隧道中嘅曙光,點知到上個禮拜,市場發覺原來隧道係一條火車隧道,道曙光其實係殺到埋身嘅火車車頭燈。

不過到噚日下午,花旗國傳出立法機關嘅國會同負責行政嘅白宮,成功達成共識,夠票通過呢個問銀行買垃圾方案。基本上,所有黨派嘅領導,都想快快手手通過呢個買垃圾方案。問題係個個派別裏面,都有好大嘅反對意見。

花旗國民反對方案


從我喺花旗國嘅白銀戰隊成員所講,花旗國嘅民間意見,特別係嗰啲最會出聲嘈嘅人,係極之反對今次嘅方案。

喺對上個禮拜,每個國會議員嘅fax機、電話、電郵,都被反對方案嘅選民不斷轟炸。所以除非真係投咗票通過,唔係都可能仲會出現波折。

除咗花旗國嘅買垃圾方案外,如果要講番上個禮拜嘅大事,就不能不提東亞銀行嘅擠提潮。銀行排大隊嘅賓墟場面,以前香港都發生唔少,問題係提款攞本票有冇其他銀行收。

我記得好多年前,渣打銀行都發生過擠提潮。當年我好細個嘅表弟,因為將啲利是錢存咗入渣打,所以就排隊攞錢走。搞到我姑姐為咗個千幾蚊,要陪佢排隊排足成日,幾經辛苦先攞到錢。

之後幾日,我哋一齊出嚟飲茶,我老竇就問我表弟啲錢點,佢就攞個卡通主題銀包出來,畀我哋睇吓佢啲錢。

踢信貸評級公司門


我老竇望一望,之後就問:「你攞嘅全部都係渣打出嘅銀紙,執笠都係唔值錢。」嗰一刻,我個表弟差啲喊出來。

點都好,聽聞政府話會開始拉人,我話非常好!第一個應該踢門嘅地方,就係啲信貸評級公司。

多唔好講,今時今日東亞銀行嘅信貸評級,居然低過6月嘅雷曼兄弟。散播埋啲咁嘅訊息,仲唔抵拉?

講起雷曼,就要提一提啲買咗佢哋出嘅迷你債券買家輸錢事件。好多人嘈話銀行職員,冇話過原來雷曼執笠,係會輸晒啲錢。講真,如果A級評級都要唔信,銀行職員就會個個變成我咁,只會叫人買白銀同黃金。

5 comments:

  1. 我在uk購入十磅黃金!!
    做黃金戰士!!!
    金光閃閃多美麗,金光閃閃叫人迷!!!

    ReplyDelete
  2. 百金升降機!!!!!
    升!! 升!! 升!!

    ReplyDelete
  3. 十磅黃金?

    Thats like 100+ Oz.

    You are a rich man.

    ReplyDelete
  4. I love you Pakman. Yes, in Lehman's case, the rating implied that the investment was good.

    ReplyDelete
  5. 好少錢.....

    計計.. 十磅黃金=160安士.
    若用usd900來計.
    160x900=usd144000 (冇計錯嗎??)
    總數都係百多萬....

    買層何X田X號都要千幾個啦....
    可能買隻馬响香港跑都要.....
    閣下您講笑!!!!

    咩... 咩... 咩...

    ReplyDelete