黃金12月大茶飯

上個禮拜，孫柏文識得嘅貴金屬投資者，相當興奮。佢哋咁興奮嘅原因，係因為黃金市場出現期貨平過現貨嘅情況，即係backwardation。

書本中對於backwardation嘅解釋，就係當一樣貨品嘅供應突然出問題，未來交收嘅期貨價會低過即時交收嘅現貨價。

期貨價低過現貨價

而最重要係根據佢哋嘅研究，黃金市場喺歷史裏面，backwardation從未發生過。

其實，對上幾個月都已經有好多黃金投資者，話今年12月黃金市場嘅運作會出大鑊嘢。佢哋話睇12月需要做交收嘅黃金買賣合約，賣方根本冇足夠嘅黃金畀人。

佢哋又咬牙切齒咁話啲買家一定要攞黃金實貨走，所以就會出現比起上次大眾汽車股價一日升幾倍更厲害嘅挾沽倉行動。

講真，聯儲局為首嘅紙幣狂魔集團，已經走到差不多最後一步。當聯儲局會印新鈔票去賠畀啲銀行，直接購買佢哋嘅有問題資產，代表借咗錢嘅人去還錢，呢個就係佛利民話齋嘅high powered money。如無意外，奧巴馬下台前，就會有一場失控大通脹。

引發挾倉隨時大升

12月已經過咗一個禮拜，好快就會知黃金係咪真係會有咁厲害嘅挾沽倉行動。最後，呢幾日好多人都問我知唔知加藤鷹嚟咗香港。我只可以話《金手指》係佢老哥隻「金手指」嘅fan屎。超勁！