熊貓咬人點解唔使坐監？

孫柏文呢排睇到花旗國3大汽車公司問國會攞錢嘅情況。不過國會對汽車工業嘅要求，肯定同之前對銀行業非常唔同。

例如，有議員話通用汽車要攞錢，就要換話事人。雖然聽落合情合理，但之前啲銀行攞錢呢？直至今日，花旗銀行嘅魯賓都仲喺董事局也文也武。

有好多唔明金融業對保持社會日常運作有貢獻嘅特區人，成日都話：「金融業唔係實業，只得炒炒賣賣。製造工業先至最重要。」

對於呢類人，見到花旗國國會今日嘅所作所為，結論就係擺到明歧視汽車業。對於呢啲睇落非常肉酸，唔係一視同仁嘅舉動，特區都有。

作為一個前唐狗狗主，人類養活咁多動物中，狗對人嘅貢獻最實在。如果類比工業種類，狗就肯定係汽車業。而不能自然咁適者生存，就要政府出手相救嘅銀行，對於嗰啲覺得金融業只係炒炒賣賣嘅人，銀行就係熊貓。

一視同仁才可服人

早排海洋公園發生熊貓咬人事件。海洋公園快速判斷非熊貓之錯，仲要話係人為行政錯誤。如果係隻狗咬人，已經要去漁農處坐一個禮拜監。

所以要人服，就要一視同仁，就算係國寶或銀行，做錯事都要受罰。