一夜拉晒折扣的士

孫柏文真係估唔到，一場泰國政治示威，最終威脅嘅政權係我哋特區政府。一場非暴力抗爭，居然流咗香港人嘅血。

其實，如果唔係咁多特區人滯留泰國，最後仲遇上車禍，政府今日面對嘅最大政治問題就會唔同。

冇「滯留泰國 + 車禍」問題，又會係咩問題？肯定就係因為折扣的士出現，所以政府推出「市區的士有、新界的士冇」嘅「短加長減」的士收費改動。

多都唔講，淨係因為由機場出發去偏遠新界地方時，搭市區的士平新界的士好多，搞到新界的士忽然冇晒生意衍生出嚟嘅民怨，已經係好大嘅政治問題。

「短加長減」係對付長途折扣的士嘅政策，而因為長途乘客目的地或起點大多數都會包括市區，基本上折扣的士係市區的士嘅「家事」。不過政府應對嘅政策，居然害到無辜嘅新界的士，死未？

其實，「短加長減」係想抄襲折扣的士搭長途比較平嘅效果，亦因為出發點係咁，所以一定失敗。對於坐私家車嘅高級官員，折扣的士嘅神髓就係「平」，其實對乘客嚟講，真正嘅神髓係「時間換折扣」。

Call同等折扣的士係要時間，現在一刀切「短加長減」，只令嗰啲想有即時上車快感嘅乘客，無端端着數咗。

短加長減累新界的

行政機關搞咁多嘢，係因為冇能力正面回答「究竟折扣的士係咪唔搭得？」呢個問題。

所以我建議，不如一夜拉好多折扣的士司機同乘客，揀有代表性嘅例子告上法庭，不過同時資助佢哋打官司。特區有個三權分立、互相制衡嘅美麗機制，折扣的士最終係咪唔搭得？等官判。