祝醫療券好運

噚日，孫柏文同一個中學同學講電話。我以前讀Island School，呢個同學係個鬼仔，我做學生會主席時係我嘅「局長」。傾傾吓，講到明愛醫院有病人暈咗喺門口，跟住醫院嘅詢問處職員叫同病人一齊嘅仔打999嗰單嘢。

按指引做怕孭鑊

佢話睇西報都有睇到呢單嘢，而佢嘅結論係：「There's no common sense left in Hong Kong.」你話一個中國人用咁嘅說話鬧都算，不過由一個前殖民官員嘅下一代講，真係特別難聽。

我自己都有諗過，究竟要發生過咩事，公司流程要點，先會令嗰位詢問處職員有咁嘅建議。喺我個腦就開始浮現一間會議室。

冇錯，一定係會議室開始。

跟住就見到一個好惡、開口埋口都講「紀律」、「系統」，亦升職升得好快嘅小頭目，指住一個年紀大過佢嘅下屬大大聲鬧：「我唔理為乜，你冇跟住手冊去做就係錯。」

唔理common sense照跟

小頭目跟住就向會上其他職員話：「下次再有人唔跟手冊做，我會跟人事部指引，即炒。公司仲要唔使賠糧。」

如果我有份開嗰個會，真係連我都可能將僅有嘅 common sense拋掉。

系統一定要有，問題係點樣先有常理。只要個系統冇競爭嘅鞭策，就最終會變到冇常理，政府醫院就係咁。一月一日醫療券將會推出，希望啲民辦嘅醫療機構爭氣。

祝醫療券好運！