如何避開馬多夫同迷債

之前，孫柏文曾經同大家分析過，四級投資者中，有邊兩級會買迷債輸錢。而四級嘅分別就係，最低級「唔識」，之後就係「半桶水」，跟住就有「識嘢」，最後亦係最高級嘅有「叻得滯」。

之前話過，「半桶水」同「叻得滯」嘅投資者，就會因買迷債輸錢。

輸錢嘅非富則貴

其實，睇花旗國馬多夫500億美元騙局，輸錢者都係一樣。當然，輸錢嘅全部都係非富則貴。

第一級知道自己「唔識」嘅投資者，一聽到馬多夫啲「期權正股對冲」策略，就會腳軟。跟住就話：「我都唔識。幫我買啲國債收息就OK。」所以冇事。

第二級「半桶水」嘅投資者，聽到馬多夫管嘅錢喺咩時世都有穩定回報。又聽到佢係前交易所主席，好多其他有錢人信佢，信譽良好，要提款時速度非常快，一於畀晒啲錢佢管。所以輸大錢。

第三級「識嘢」嘅投資者，一睇馬多夫之前投資回報紀錄，就會諗：「條友點解可以咁勁，咩市況都係咁穩定同必贏？不過自己用番呢十幾年嘅收市價，去砌番個model，都砌唔到佢嘅紀錄。」深明呢個世界冇免費午餐，所以避之則吉，最後冇事。

叻得滯以為筍嘢

咁第四級「叻得滯」嘅投資者又點？佢哋絕對明白咁穩定同必贏嘅回報，肯定唔正常。但又知道馬多夫除咗幫人管錢之外，旗下公司係好多隻股票嘅流通量供應者（即係做莊）。

佢哋深信馬多夫一定係喺做莊活動中，攞到啲買賣盤嘅獨家資訊，跟住好冇道德咁攞啲獨家資訊嚟搵錢。所以不但會瞓身，仲要問滙豐（005）借。

最後點？大家心照。