Wednesday, December 17, 2008

香港醫生太羞恥

噚日,孫柏文揸揸吓車聽收音機話:「亞視管理層又出現大變動,商務及經濟發展局副局長蘇錦樑……」
我嘅即時反應係:「嘩!曾經向英女皇效忠過嘅蘇錦樑,過檔亞視!」
點知收音機繼續解釋:「蘇錦樑表示,政府關注事態發展。」

聽完我就諗,亞視經過連日嚟嘅發展,真係已經冇乜嘢係完全意料之外。

「張王配」做大戲

我甚至推斷,張永霖同王維基其實已經加入咗,早排霸佔旺角行人專用區嘅「好戲量」劇團。張、王兩人只係做一齣大家作為觀眾都可以參與嘅戲。
我只怕觀眾知道佢哋加入咗「好戲量」,會投擲鏹水彈。到時希望王維基嘅身手有布殊咁敏捷。

可能係一廂情願,不過真係唔想「張王配」呢陣特區密室中罕有嘅清風,只吹得12日就因王維基走人玩完。

可能今次完全係王維基嘅佈局,希望香港人知道亞視幾腐敗,無綫(511)幾獨大,之後政府發新嘅數碼廣播電視牌照時,唔可以送畀亞視、無綫,一定要通過拍賣、投標。城電(1137)就可以買牌,搞免費大氣電波電視。

一場非常豪邁嘅「勾」牌行動!

私有領匯有私心

講起特區呢個密室,今日立法會將會辯論促請政府國有化領匯(823)嘅動議。咁硬膠民粹嘅嘢,仲居然係醫學界功能組別嘅梁家騮議員諗出嚟。

點解功能組別都搞民粹嘢?因為以前冇領匯時,屋邨營業醫生嘅舖位係分餅仔。所以佢哋可以從屋邨攞綜援啲公公、婆婆、BB仔手中,冇競爭咁收錢,之後買波子跑車媾姐仔。

有領匯之後,居然要競爭,就當然想時光倒流,搵弱勢政府接管,跟住又可以買波子媾姐仔。

如果梁家騮嘅想法係一般醫生嘅想法,香港啲醫生實在太羞恥。

---------------------------

There are responses to the piece above that first appeared in my column in today's Apple Daily over at my last entry. Copied to here...

孫先生:

拜讀了閣下在《蘋果日報》經濟版的專欄,小弟想補充一點資料:

其實「領匯」未成立前,房署商場裡的醫生診所,有些不成文的很不公平的規定:位置永遠是最差最偏僻的(因為人們不會行行下見到忽然想入來看個醫生先…);就算是同一個鋪位,用來作診所的比起其他做行業的租金都會忽然地貴了一大截,原因不明(行家很自然便會戲言:可能房署的大官們都以為,醫生們都是搵大錢搵陰質錢的,他們俾得起…)。這些事情存在多年,大家都只是乾忍而沒有發聲。

好了,到了領匯來接管了,美化商場,重新規劃,美其名是說將診所Group埋一齊,其實是全都被逼遷到比原來位置更差(例如何文田區某舊村商場,以往人所共知都是故意避開的,只是開些文具鋪之類;但是領匯本著「最差鋪位必歸診所」的關係,真的將望向「萬國大酒店」的鋪位劃為診所區;我唔相信公公婆婆們會入來看醫生囉,啋,大吉利是咩…)

無得揀,你唔妥協咩?佢咪唔同你續約囉,逼你走,領匯這度板斧大家都耳熟能詳的了;再唔係就加你三四五倍租(無錯,醫生們的是搵陰質錢的)。屋村醫生的是札根地區的,靠的都是街坊生意,老實說除非你很掂又真的仲後生,否則大部份都不敢貿貿然搬走的;重新黎過起碼又要守得三五七年…

除左咁,「市值租金」一事又是萬般詭異。領匯常說房署時代租金太低,現在大翻新了,要交市值租金。領匯便延續房署時代的不公平政策,再來個發揮得淋漓盡致,先來個市租,做診所的?好,市租上再添一點,這才叫做「合理」。大佬,咁點做呀?如果要絕對「公平」,大家一齊交市租,好,咁既然數目一樣,我不如租港景峰啦,駛乜踎響何文田……訧等於宜家叫你交「市租」,用新樓曼克頓山的租金價來租樓齡卅年的荔景山道陳舊居屋屋苑,咁就夠哂公平了!領匯商場就是領匯商場,怎可能說位於市區地王就是要收天價租金的?!一句到尾,佢就係睇死你唔會走唔敢走的(診所嘛,街坊網絡最重要)。

其實經濟轉差,行行怨氣都加深了;私家醫生尤甚,經營環境真的跟經濟週期有著莫大關係,不得不承認現在個市真的淡了很多。但是本人絕對唔以作為醫生為恥。不是說啊醫生很辛苦training很慘行醫生很偉大云云等陳腔濫調,我不會說這些;而是做醫生既是一份工作,也都是服務人的,照顧人的,絕對不是奇貨可居的陰質錢。我自己都有同學,大學時代起我從來都不覺得他偉大,絕對不是甚麼「好人」,食飯唔俾錢借了我的筆記又唔還;但他都會知道公公婆婆沒錢,減收甚至免了診金或藥費;而且這樣做的不止他一個人。

始終,屋村普通科醫生,以我幹了這行這麼多年看,正所謂餓你唔死囉,但你要發達渣波子媾姐仔就「mun」D囉。除非你是「中移動股神」,但話是話,如果屋村咁掂你就唔駛成日要 kup住個市啦。又除非你是大國手在嘉賓大廈有幾間鋪在中環813返工,咁你絕對可以渣波子媾姐仔囉;但又有幾多人可以響返中環813先至得架,個定位都唔同。屋村鋪就係屋村鋪,在商言商我相合孫生你仲明白過我地啦,絕對唔係歧視唔係social class discrimination。

不過,話說回來,如果說醫生是「低能」,這點我倒不會完全否定。為甚麼呢?其實這行業就像國民黨,派系問題嚴重,不同的會
代表著不同的利益集團。你看當年醫學界功能組別選舉你便會知道。所以,梁醫生這個動議,就應該不會是代表著他所代表的集團而提出的(所以「所有醫生都是無恥」這個說法更不成立);至於為何要為「他人」(個人相信又未至於「敵國」既,始終選舉都已經過去了)提出這個動議,是為了平衡利益呀還是為了代表業界利益呀甚麼,我就一點都不知道了;始終議員任期有成四年咁長喎…。

與其說醫生低能,不如說是太「高能」,太散了,但是管理的都竟然還一樣是醫生。就是他們瞭解這一點,於是就最擅長利用這一點達到目的,分化你,打擊你。你看醫管局跟年青醫生的角力,每一回都是這樣,分化唔同的集團,所以最終都係建制贏哂,年青醫生勢孤力弱,必定輸哂。你看最近的「強制簽九年長約」事件你就知啦,難怪我的師弟跟我說是否要改名叫自己做「Isabella」,只可惜佢沒有認識到一個小超人做後盾……

太長氣了,最後必定要說明一點:本人是私人執業專科醫生,不是屋村普通科醫生,沒有呃公公婆婆BB仔的綜援錢,也沒有渣波子沒有媾姐仔。我只是每天很努力的工作賺錢養家,上有高堂下有妻室。不是渣不起波子的問題,唔係話做醫生賺的就會是陰質錢,而是每個人的價值觀不同,在旺角做Saleslady都會有人拎住LV袋返工,就是這個意思。Again, 絕對唔係歧視唔係social class discrimination。


Let the debate continue...

13 comments:

  1. 陣風真係吹完左

    http://www1.881903.com/apps/newsBoss/html/news/20081217/2008121718050250600.htm

    俾個顧問位,係安慰奬定係下台階?

    當日亞視宣佈搵張王做CEO,有D期望,仲估亞視係咪真係想將戰場由傳統媒體帶到去網上

    王維基話唔做中央台,好興奮,以為會多番個電視台睇

    新聞部頭頭辭職,有D擔心,王維基會唔會變左做現代版王安石

    張永霖話王維基辭左職,好失望

    王維基發聲明話仲未辭職,有番少少希望

    終於,陳永祺宣佈王維基辭左職,徹底失望

    其實,係咪一開始就唔應該對亞視有期望

    ReplyDelete
  2. yes, no more expectation.
    closing down ATV,
    open another new Free TV,
    in order to create competative environment, open one more Free TV, and one more, and....

    BroadBand TV now is ......

    ReplyDelete
  3. 以下是小弟的Blog, 有時間可以入黎參觀吓? 多多指教!
    http://wongluijason.blogspot.com/

    ReplyDelete
  4. "香港D專欄作家"也實在太無耻了PAKMAN

    ReplyDelete
  5. 其實唔只係亞視,香港好多公司機構都係咁啫

    大老闆見盤生意唔掂,搵人返黎改變
    結果如王維基一樣, 改改改
    大老闆跟本就接受唔倒, 親手炒返走佢

    大老闆諗極都唔明,問題正正就喺大老闆到

    ReplyDelete
  6. 喂,Pakman你今日在Money Cafe中講載住你阿媽同你朋友,咁好同條女見阿媽吖?咁你咪溝港女成功咗?恭喜哂!Hahaha

    ReplyDelete
  7. Well Hammer boy,

    The boss must be a rich man. Another $1b down the tubes.

    Dear Anon,

    Thanks. Jealous?

    ReplyDelete
  8. Hahaha 只係見你溝女成功,替你開心。又見到在香港的千千萬萬港女為你傷心...hahaha

    始終溝女成功都要賀吓嘅

    ReplyDelete
  9. 魔童最錯係冇自己班底

    我估佢想借亞姐事件郁一啲名妓都唔敢郁嘅人

    點解声明話短暫的未來不能再合作,明明俾人過左戙都仲要稱兄道弟?!He 'll be back!! Saga Continuous...

    ReplyDelete
  10. 食得鹹魚抵得渴, 租貴咪搬囉, 挑!

    ReplyDelete
  11. 孫公,你個標題...

    我想話...

    挑,有乜野咁羞恥遮,大家咪又係想賺多兩個錢,個個都唔想同人競爭開拓 blue ocean 架喇。

    ReplyDelete
  12. 入地話當事人唔"確認"嘅均屬"謠言", 咁你有無打算"確認"一下你溝到個條港女係咪佢?

    ReplyDelete