Monday, March 09, 2009

十年前蓋特納已膠爆

「財長蓋特納去了那?」好似人間蒸發咗咁。

不過佢老哥唔出嚟見人,孫柏文係可以明白嘅,因為條友直到呢刻硬膠到爆。除咗係咁叫患有嚴重肺癆嘅金融業飲咳藥水之外,就冇料到。

問題係,財長叫飲咳藥水係因為佢冇其他藥,定係佢真係覺得淨飲咳藥水就可以醫番好?

即係如果佢係醫生,佢有冇斷錯症?
佢嘅斷症能力係點?

問花旗國人就好難知,因為佢哋未見過「膠蓋」話事,膠蓋喺花旗國一路都係啲中級公務職員。不過大家如果有落蘭桂坊、駱克道蒲,就知呢啲喺祖國係中級職員嘅人,嚟到遠東就係大支嘢。要知掂唔掂,問總公司人不如問本地同事,膠蓋就係最好例子。

原來當年97金融風暴,花旗財政部就派咗膠蓋去印尼做代表。搞完之後,結果令印尼成為20世紀裏,國民生產總值一年內跌得最多嘅國家。

同事揭當年臭事

咁係咪膠蓋嘅錯?有個當地同事話係,佢就係澳洲90年代總理基庭。

喺上個禮拜四一個閉門會議中,基庭插爆膠蓋當年嘅表現。話佢最大嘅錯誤,就係為南韓、印尼、泰國等國家斷錯症,跟住落錯藥。

膠蓋用咗對付80年代拉丁美洲、94年墨西哥,呢啲政府財赤衍生出金融危機嘅方法,不過因東亞嘅問題根本唔係政府財赤,膠蓋挾IMF落實嘅政策,不但冇幫助,仲要令各國國民經歷不必要嘅痛苦。

膠蓋亦令東亞各國知道絕對唔可以依賴IMF,最終令中國嘅2萬億儲備,被迫買花旗國債,變成爛仔國嘅悲情債主。基庭仲話當佢聽到膠蓋早前被爆冇交稅,完全唔覺出奇。

一日膠蓋當道,一日冇運行。

4 comments:

  1. 誰流下了慯感的流淚??

    掉眼淚.....

    ReplyDelete
  2. 乜佢重硬膠得過PAULSON咩,救一間唔救一間,使銀行互不信任,利率大幅上升、股市下滑,直接使經濟陷入更深的深谷。

    ReplyDelete
  3. As the Treasury Secretary without paying his own tax, how can we have any trust in this person ? I guess Obama has a very big mistake in choosing such a person to be the key personnel to resolve the financial mess of today.

    ReplyDelete
  4. 小孫如果你看過 "一個經濟殺手的告白"這本書,你就知當年膠蓋係立左功。佢今日之官位是因佢當年既功勞。

    ReplyDelete