奉曾淵滄之命講石油

上個禮拜四，曾淵滄教授喺隔籬版佢老人家嘅專欄話：「昨日大市大幅上升，恰好補回前日之所失，一跌一升，全是由美股拉着鼻子走。美股則由油價拉着走，或者再加上個別企業的業績所影響，但主導力量還是油價。有趣的是，《蘋果日報》財經組內有位前全職的分析員，叫金手指，他以前曾擔任過全職石油分析員，老編為甚麼不叫他開個石油專欄？」

孫柏文先澄清老編有叫過我寫，不過我唔識睇油價短線走勢，所以一直冇寫，既然曾前輩有命，我用咗幾日時間不斷反覆深思，得出一個結論，所以今日就講吓石油。

油價短期走勢靠估

首先我一定要強調，短期嘅油價走勢，絕對係靠估。甚至連之前冇耐嘅油價走勢，點解升咗或者跌咗嘅原因，都係估估吓。

例如，之前油價以高速直逼150美元一桶大關，個個都有解釋方法，乜嘢石油庫存、伊朗火箭、大鱷造市等，都有人講。

不過現在過咗一陣之後，先發覺嗰排有個叫SemGroup嘅油管網絡公司，因為之前大量拋空石油，最後被人挾倉、call孖展，所以天價都要買番啲石油。當然，究竟係咪SemGroup最後令油價逼上，我都係估估吓。

如果油價短期冇得估，就只能希望長線可以有路捉。長線價格，當然又係供求決定。今日就專注講需求。

其實，油價喺世界成交桶數冇下降嘅情況之下，都可以節節上升，大家作為人類應該非常安慰。理由係60億人，每日分配8600萬桶石油，用得最冇效率嘅嗰桶石油，都可以帶嚟百幾美元嘅經濟效益（如果你用一桶石油冇百幾美元嘅效益，你就唔會捨得出咁嘅價）。咁價格不斷升，即係用得最冇效率嘅嗰桶石油，都被用得越來越有效率。

政府補貼唔使理效率

以上嘅理論當然可以係錯，價升唔等於效率提升。點解？就係如果政府進行補貼。當用家毋須要面對油價嘅升幅，就唔會提升用油嘅效率。效率低當然唔好，中央政府都知。不過政治上，大家都知補貼有幾好，一貼冇人嘈。

所以怕人嘈時，例如奧運前夕，補貼主導。唔怕人嘈嘅時候，例如奧運完，「閂埋門」後，就會減補貼。結論就係，奧運概念股我就冇，不過「奧運後概念股」就有，減補貼就要買中石化（386）。