中油股東心驚慌

今日同大家分享一個故事。早幾個月前，孫柏文同幾個同事喺度諗，不如過咗立法會選舉之後嘅9月中，放假遠行。一班人去，當然個個有唔同嘅要求。

首先，有港女同事R話要去一個「撞唔到香港人」嘅地方，跟住就有後生仔M話要去個「平到可以做大爺」嘅地方，我就想去個好多唔同嘢食、好多特別酒飲，不過香港冇得試嘅地方。最後我哋幾個都想去啲人好nice嘅地方。

撐分離分子開戰

兜兜轉轉，最後我就建議一個未聽過香港人去、搭的士平過香港搭巴士、被稱為紅酒發源地、喺國際自由市場組織會議上，喺嗰度嚟啲人好nice嘅格魯吉亞（Georgia）。

我一講，啲同事都幾興奮，咁我就開始睇吓可以點去。原來最平最快嘅方法，就係搭Aeroflot，經莫斯科去。

到上個禮拜五晚，啱啱睇完奧運開幕儀式，開始睇新聞報道時，先至知格魯政府，揮軍進入想搞脫離嘅南奧塞梯（South Ossetia）。同時又見到俄羅斯派軍，挺分離分子，又話俄羅斯同格魯會中止空中交通服務。

喺新聞報道差唔多播完時，後生仔M嘅電話短訊已經殺到。佢問：「咁係咪我哋去唔到？」我答：「去到。不過我諗要改搭其他航空公司。」

到噚日，後生仔M同我喺《蘋果日報》嘅newsroom睇格魯吉亞戰事最新片段時，佢話：「如果喺9月發生，我哋成班人可能已經變成戰地記者。」我話：「乜嘢可能!直情已經做緊啦。你就去前線南奧塞梯，我就留喺首都訪問吓啲開唐餐館嘅當地華人，睇吓佢哋煮烤鴨嘅供應鏈有冇出問題。」

中亞油田危危乎

佢望住我問：「咁都得？」我答：「咁我始終都係財經版，要搵財經angle嘛。」

不過認真啲講，今次俄打格其實對祖國好麻煩，因為就算俄羅斯嚴重侵犯格魯吉亞領土，都好似冇後果。格魯吉亞已經喺中亞裏面，同西方國家最親密，咁樣被人打都冇人幫，咁其他中亞國家咪遲早都會被俄羅斯食咗。

例如中油香港（135）最大盈利貢獻嘅油田，就喺哈薩克斯坦 Kazakhstan。格魯吉亞失守，咁呢個油田又點算？唔怪之得中油香港嘅股價越跌越有。悲劇。

------------------------------

Georgian TV reporter shot by Russian sniper during live broadcast...



Could have been me and my Apple Daily colleagues...