期待有線財經播奧運

唔知道係咪「全球一體化」帶嚟嘅現象。今時今日世界各地嘅傳媒，都喺度玩「尋找Obama兄弟姊妹」呢個搜索遊戲。

繼早前有前宗主國報章，喺深圳搵到Obama一個做出入口生意、娶中國人做老婆嘅兄弟之後，早幾日，就有意大利文嘅《Vanity Fair》，搵到Obama年僅廿六歲嘅細佬。

佢呢個細佬好慘，住喺肯亞首都嘅木屋區，日薪一美元。唔同嗰啲喺特區，社工揀出嚟話自己「畀完個女食麪包，自己就冇得食」嘅「催淚人辦」，呢個細佬身材瘦削，大家唔信可以睇番本報嘅archive，就會發覺嗰啲新界社工最鍾意揀啲肥婆綜援戶嚟話自己唔夠食，匪夷所思。

我推斷，全香港癡肥病最嚴重嘅一個收入級別，肯定係綜援戶。

尋Obama兄弟姊妹

講番Obama，噚日，我同《蘋果批》高明輝講話全球傳媒都玩搜索遊戲時，佢就答：「唔怪得Obama咁有魅力，淨係睇吓佢老竇可以溝咁多女，去幫佢生咁多仔女就知。」

入正題，孫柏文喺大約10年前，就發覺自己每一次睇大型體育節目時，都會幻想喺電視直播時，係咪可以留番一條聲音頻道，簡簡單單喺球場收音，唔使「專業」評述、電視錄影廠嘅閒話，淨係要現場觀眾聽到乜，條頻道就會播乜，完全冇「value added」，都唔知點解，係要迫我聽。

其他種類嘅直播節目都唔好得多，例如我其中一個最喜愛嘅節目──《立法會直播》，都唔知點解，當有官員或議員由用中文變用英文時，係都要迫我聽繙譯，搞到我次次都要轉台，先至可以原汁原味。

原汁原味睇直播

當我非常沮喪時，突然出現一道曙光。噚日卒之發現一個節目，原汁原味冇「value added」咁直播，乜嘢節目？咪就係噚日睇《有線財經台》，直播長實（001）同和黃（013）中期業績記者招待會。

李嘉誠一句用兩文三語、記者們嘅笑聲、PR小姐聲音帶着嘅沮喪，都係現場人士聽到乜，觀眾就聽到乜。我作為觀眾，猶如去到現場非常開心，不過不能想像，如果俾無綫派兩三個前港姐，以「係都要add value」嘅心態去做評述，又會點？

希望到2012年，有線獨家播奧運時，留條「現場」聲音頻道畀我。