重申一注獨贏買白銀

各位白銀戰隊成員，隊長speaking。我知道上個禮拜五，今個禮拜初辛苦了大家！如果你係靠借錢做margin嚟買白銀，你應該已經被斬倉。不過如果你冇借錢冇做槓桿咁買實貨白銀，今次冇錯係一場災難，不過同時造就咗一次大舉入市嘅良機。

所以今日，我要重申一注獨贏買白銀。
重申建議買入：白銀
目標價：每盎斯120美元
年期：至2016年3月6日

跌浪造就入市良機

有貴金屬淡友話，之前3月個個開口埋口都講「滯脹」時，好多從未買過貴金屬嘅人，都蜂擁入場。到咗今日，已經再冇人講「滯脹」時，當然就掟晒啲黃金、白銀。

呢個見解孫柏文冇異議，我估有好多呢啲新人，喺呢個跌浪已經離場。剩番忠心耿耿，對戰勝紙幣狂魔不離不棄嘅白銀戰隊成員，仲揸住白銀。我哋係唔會賣嘅！冇人再提供沽壓，白銀仲唔見底？

多都唔講，平時白銀喺亞洲交易時段係唔會點郁，平均每日都係喺花旗國開市之後，銀價先至大上大落。不過今次大跌市，銀價嘅低位14美元一盎斯，就係喺香港開市時造嘅，仲要係喺14.5美元一盎斯，以極高速度掟落去。

之前幾日，花旗國市開市已經有咁嘅現象，最後亞洲市都一齊發生。「被人以高速掟落去」即係點解？咪就係啲借錢買白銀嘅人，被終極斬倉。

情況與活塞男相近

最後，白銀戰隊隊員《蘋果批》嘅高明輝忍唔住都想講番幾句：「早排喺蘋果動新聞入面睇到一條歷來最多人睇嘅片段，就係活塞男嘅片段，第一次睇，的確幾好笑。之不過，咁啱嗰幾日，白銀價格亦都直線向下插，我手頭上嘅白銀，竟然巧合地同活塞男當時嘅情況一樣，走又唔得，留低又尷尬。當我望住嗰個圖表，見到白銀價格直插到近14蚊嘅時候，我忍唔住學活塞男咁大嗌咗一聲：嗚呀！」

高明輝係買實貨白銀。所以我要同佢講句：「你僥倖活下來，就要好好活下去。加碼買白銀啦！」