「大奇迹日」一周年紀念

2007年8月17日，即係孫柏文叫大家「一注獨沽賣滙豐」之後嘅第三個禮拜，我去咗佐敦道附近嘅一間餐廳食晏。

當時，因為我有跟足「《金手指》憲章」，即係提供「一注獨乜」投資建議時，自己都會喺文章出街嗰日，一齊做買賣。所以喺舊年8月17日嘅午間休市時段，我成手滙豐put輪。

當日因為一啲私事好忙，全日第一次睇吓恒指係點，已經係我食完晏嘅下午2:40。仲記得踏出餐廳門口嗰刻，舉頭一望對面街間銀行，個顯示住金融資訊嘅液晶體電視，睇到恒指跌1200點，心裏有種被平反嘅感覺。

難脫「明燈」之名

之後我就搭公共交通工具，返去位於將軍澳工業邨嘅壹傳媒全球總部。喺車上，我就開始諗，如果保持呢個下跌速度，滙豐咪好快會跌到落去我嘅目標價？
嗰啲之前鬧到我瞓街嘅人，仲唔大啖大啖咁食crow pie？

返到壹傳媒全球總部《蘋果日報》嘅辦公室，下午3:45，一如所料，好多同事圍住嗰幾部Bloomberg、路透社、股票報價機，個個嘩嘩聲。

我行埋去，諗住畀人恭喜吓擺脫「明燈」呢個名，點知第一位同我講嘢嘅同事就話：「喂！明燈！」
我答：「跌1200點喎，仲明燈？」佢指住個 Bloomberg Terminal話：「你自己睇吓。」
我答：「嘩！」冇錯，反彈1000點。Deep V一詞加上新意思，真係永遠唔會忘記嘅一日。

恒指Deep V反彈

提一提大家，嚟緊禮拜三我將會搞個集體禱告，求神再賜多次「港股直通車、資金自由行」，到時請大家踴躍參與，喺我個blog報名。

最後，相信大家都有睇北京奧運賽事。大家都知我哋祖國喺金牌榜上面，暫時遙遙領先，因為啲田徑決賽未進行。不過值得一提係，如果我以前間大學係一個國家，淨係我哋舊生嘅金牌數量，如果拍埋啲國家咁比較，只有祖國、花旗國、前宗主國同德國比我哋多。

冇錯，孫柏文嘅母校就係密西根大學，我師弟就係 Michael Phelps。