庸官邱騰華 再製「八萬五」

上個禮拜四傍晚，特區各油公司，因為收到香港政府發展及改革局（發改局）局長邱騰華命令，所以fax畀各大傳媒機構，宣佈喺禮拜五凌晨減電油價。冇錯！當立法會通過法例賦予行政部門有權控制油價之後，邱局長亦非常踴躍去行使呢個權力，為民請命。

減價後即冇得買

點知喺禮拜五凌晨，當油公司減價之際，喺紐約商品市場，每桶原油價突躍升5美元。原油價升，下游被勒令減價，後果會點？冇錯！油站價錢牌，確實顯示降低咗嘅價錢。不過如果你想買電油，根本冇得買，因為油公司封盤唔做生意。

唔信？你問你識嘅人，有冇人可以嗰日成功入油？冇呢。要去到禮拜六，紐約商品市場每桶原油價跌番6美元，油公司先至重售電油。

最離譜係油公司封盤呢件事當中，居然冇任何傳媒機構報道。離譜！強烈要求立法監管油公司賣油量！監管傳媒報道手法！

以上就係孫柏文「民粹政客」上身。不過究竟係邊個民粹政客，我就唔講，費事要列出幾百個名。禮拜五全香港都冇油賣的原因，係因為9號風球。不過如果我講埋呢樣嘢，就不是一個稱職民粹政客。

點都好，邱騰華已經百分之百證明佢自己係位為「今日過關」，唔理政府長遠管治能力嘅庸官。佢今日走出嚟領功，令市民覺得政府不但有權力，仲要有責任去要求油公司減價，將控制油價嘅責任攬上身。

到邱騰華走之後，呢個責任就會畀咗下個。邱騰華如果今日講真話，政府他朝就唔使麻煩。仲有，如果冇權力同責任控制油價，他朝邱騰華去油公司打工，都會冇人嘈。

壓油價樓價異曲同工

以前九十年代初，政府推出三成首期政策時，真正原因係為咗確保一旦樓市下滑，銀行體制唔會有事。不過當年，政府就好似邱騰華咁，唔講真話，仲要大大聲話係為「壓抑樓價」，為民請命。

點知就將「壓抑樓價」嘅責任攬上身，最後變成「八萬五」，亦造就「紅灣半島」事件。曾特首，同邱局長講吓啦！