金手指第三季總結

總結金手指篤過嘅「一注獨贏」貼士，可用24字總結，「金融海嘯、淹沒全球、水未始退、生死未卜、產值難定、有價就沽」。以下係我對啲貼士喺第四季嘅展望。

白銀：自從3月大升至21.44美元一盎斯後，跟住又大落。不過白銀喺第三季初嘅7月，曾經又見19.55美元一盎斯。不過一見就大幅下瀉，全球進行減債、減低槓桿活動，包括白銀等資產，面對金融海嘯無一倖免。

銀價上落如一場夢

白銀喺9月，最低曾見10.31美元一盎斯。比起06年3月，孫柏文第一次建議大家「一注獨贏買白銀」時嘅銀價10美元一盎斯，冇乜分別。兩年半嚟，一場夢。最後第三季收報12.10美元一盎斯，做白銀戰士非常辛苦。

喺我第二季嘅總結，已講過銀行撇賬活動繼續，因之前撇賬要鞏固銀行資金，每次引入嘅新資金都中招輸錢。我話：「羊牯雖然多，不過都會有用盡嘅一日。一旦冇羊牯，又遇上啲中央銀行冇錢，啲國際級銀行又再風起雲湧。到時候會否發生骨牌倒閉潮，就真係唔知囉。」

冇錯7月2日《金手指》嗰篇文係咁寫。不過估唔到嘅係，可以預測事件發生，不過白銀作為貴金屬，都可以大跌。

商品市場嘅「銀價」，已開始同實貨脫節，實貨銀價比起商品市場「銀價」嘅溢價越來越大，需求冇減。

所以維持建議：強力買入
目標價：120美元一盎斯
有效期至：2016年3月6日

中油收息等回購

中油香港（135）：因為油價08年頭半年非常強勁，令中油香港半年業績不錯，其手頭現金已超過1元一股，可能因為咁，公司管理層開始進行股份回購。雖然要回復到我推介嗰日嘅6元股價，要一段日子，大家就收股息，等股份回購。

基本因素冇變，只要08年下半年業績，比07年下半年唔差好多，收貨啦。

維持原本建議：強力買入。
不過調低目標價：由原本8.05至5.2元。
有效期亦延至2009年12月18日。