中信泰富 澳元概念股？

原本今日孫柏文睇到，對於中大學生報因為刊登之前被評為不雅嘅文章，被高等法院法官裁定為冇犯法，心情幾好。仲要聽到有評論員分析法官判詞之後話：「即係法官叫中大學生報，你哋毋須要再攞嗰期嘅報紙畀嗰班低B仔淫審處再次審淫。淫審處、淫審條例，通通都係廢。」

低回報投資都出事

講真，我都等緊其他因為低B仔淫審處製造出來嘅不公義，被推翻。我今日大聲哭訴：「幾時推翻Kelly Brook事件？幾時停止選擇性行刑？幾時結束對報業嘅白色恐怖？」

不過，就算有片刻心情幾好，一睇番關於中信泰富（267）輸大錢嘅新聞，就會即時沮喪。中信泰富為嗰少少回報輸大錢，仲上埋報紙頭條，大字標題話「中信泰富、炒燶外滙、勁蝕155億」。

大家要記得，中信泰富喺停牌宣佈呢段消息前，公司總市值都係三百幾億。所以噚日，中信泰富股價咁就冇咗一半，都不足為奇。

一個最多只得幾個百分點回報嘅投資項目，根據民主黨甘乃威等硬膠立法會議員，應該屬於「好安全」、「好穩陣」嘅投資，最後要輸大錢冇理由係買家錯！
所以強烈呼籲，中信泰富主席榮智健即刻去搵甘乃威登記，記得冇理由係買家錯！
講真，甘乃威都買咗某家銀行嘅衍生工具，如果輸錢，甘乃威一定話冇理由係買家錯！

世上只有媽媽好

其實中信泰富出事，我先至領略到今時今日特區中，最睇死聯儲局伯南克為首嘅「美元紙幣狂魔集團」，唔係特區裏面嘅白銀戰隊成員，而係中信泰富。有國家國務院支持都係咁，真係冇嘢好講。

不過有樣嘢我真係想知，究竟中信泰富以前靠呢啲accumulator衍生工具贏幾多次、幾多錢，個心先至咁雄，去做最後呢次蝕155億嘅交易？

最後想唱一句：「世上只有媽媽好……有媽的孩子像個寶……」