滙豐卒之買得？

上個禮拜五，孫柏文卒之感受得到啲「大行」分析員嘅說話，對市場、股價影響力比自己強些少。大家作為《金手指》嘅fan屎，應該記得我曾建議過「一注獨沽賣滙豐」。

建議當日，即係舊年7月30日，滙豐賣140港元一股。我話過滙豐一定要對手上、當時估值500億美元嘅次按債券，價值上要重新評估，咁做對公司股價一定有壓力。亦提供當時被鬧到狗血淋頭，之後睇番尚算保守嘅目標價 112.5港元一股。不過嗰日滙豐股價升。

我記得次按風暴一路打落去時，有好多我識嘅滙豐股東，同我講到滙豐時，就算我如何用數據分析，佢哋最後都會重複又重複咁同自己講，我之後形容為滙豐股東嘅護身咒語──「滙豐派息高！」

舊年12月12日，我又寫過一篇「滙豐取消派息？」嘅文章。話滙豐為保手上資金，可能要學當時宣佈取消派息嘅UBS。不過嗰日滙豐股價冇乜點郁。上個禮拜五，啲分析員走出嚟話：「滙豐對於手上現在估值為300億美元嘅次按債券，實在係太樂觀，要大幅貶值。不過如果貶值至到較為合理水平，滙豐嘅資本就會降至同其他要英國政府注入資金嘅銀行一樣。派息自然凍過水，減一半。」

就係咁，特區股市嗰堵「跌穿一百蚊，我就會買！」嘅滙豐股價血肉城牆，一擊即破。亦令我今個周末最常聽到嘅問題就係：「滙豐到沙士價，買得未？」

等埋禮拜三至扑槌

我嘅答案係：「等多兩日，禮拜三決定。」

對冲基金贖回潮雖然就快完，不過未完。上個禮拜五，CNBC訪問UBS嘅Art Cashin，佢話股市跌勢應該喺呢幾日內有個了斷，但究竟呢個「了斷」係咩樣，佢就話唔知。對上一次Art Cashin咁講，喺02年花旗國股市見底之前嗰個禮拜。

想買嘅人，不如等埋呢幾日。