世界已食唔落美債

噚日，孫柏文開收音機聽新聞，聽到一段令我非常鼓舞嘅消息。呢段消息就係，有白銀戰隊成員，喺西貢糧船灣進行「反美帝物流活動」，想將一磚磚白銀運上俗稱「大飛」嘅快艇。

點知搬運時，遇到好鍾意拉啲「紙幣狂魔」挑戰者嘅特區差佬。

走私白銀的啓示

可能因為之前，就連上網同人分享個人對銀行信貸健全水平都俾人拉，所以呢啲擺到明反紙幣狂魔嘅白銀戰隊成員，一於好少理。一見差佬，即走。仲要俾佢哋走得甩，因為差佬聲稱事件中「冇人被捕」。

首先唔講佢哋想將啲白銀運去邊，我覺得呢班白銀戰隊物流部嘅戰友，一見水警就走，已經係對呢個盲目挺美元嘅政府一個冇得再賴嘅譴責。一班為咗服務啲諗住自救，所以買白銀來運輸嘅人，都可以一見代表政府嘅公僕，即刻唔要啲白銀，特區金融白色恐怖嘅程度已經去到極點。

仲有，雖然我唔知啲白銀運去邊，不過如果要估，應該就係運返大陸。

當祖國政府之前已宣佈白銀入境唔會收關稅時，呢班人都要走私，即係呢班白銀戰隊成員，或佢哋啲客，就連祖國政府都唔信會尊重產權，唔信會放過啲白銀。

唔信銀行的明證

其實，前日我都聽到話有大戶要求銀行，為佢準備7 位數字嘅美元鈔票，一嚿現金擺喺銀行保險箱。呢個舉動，當然係對銀行制度投不信任票，雖然星展銀行事件已證明，保險箱都唔係百分百安全，不過我都可以明白。因為當全球貨幣政策都係圍繞住美元咁走，而花旗國政府將會排山倒海咁發債，世界已食唔落美債，唔信銀行係可以明白。

不過，如果你連美金現鈔都唔信，要買實貨白銀的話，最好就係買完唔使怕政府。因為一旦見差佬，都唔使唔要。

最後想講就係，噚日政府沒收嘅白銀，我等緊刊憲去買。