仲可以幾大鑊

「世界末日」。

呢幾日，孫柏文從周圍好多人嘅口中，聽到呢四個字。經常聽到人咁講嘅原因，可能因為人以群分、物以類聚，我作為淡友咁耐，身邊都有唔少睇得好淡嘅朋友。不過以21世紀人類科技、醫學昌明、學識智慧，除咗感性唔諗「世界末日」可以發生之外，可唔可以同一時間非常理性地排除呢個可能性？

我作為一個自由市場信徒，「世界末日」呢個概念嘅界定，就不如外判畀人類歷史當中印製得最多嘅書，即係基督教嘅聖經。

金融海嘯可引發饑荒

聖經裏面話過，「世界末日」將會有四位騎士來臨。佢哋代表嘅係瘟疫、戰爭、饑荒同死亡。今日，就同大家分析吓，四環當中之一──饑荒，喺呢個金融海嘯中發生嘅可能性。

全球一體化大家都知，背後其中一個推動一體化嘅動力，就係來自人類將任何產品供應鏈嘅效率，越推越高。

經過發明冷藏科技，更有效嘅運輸系統，變壞機會大幅降低，人類食物就差唔多係最受惠於全球一體化嘅一項產品。

攞特區嚟講，700萬人口食物來自世界不同地方，除有毒奶粉外，價廉物美。不過如果掉轉頭諗，一旦食物嘅供應鏈停頓，我哋呢個700萬人嘅城市，可以捱幾耐？幾耐先會發生暴動？

銀根收緊難以周轉

銀行收緊貸款，大家都知。
試諗吓因為零售店相繼結業，銀行將食物商店同超級市場嘅信用額取消，佢哋要問批發商借貨。
批發商嘅信用額同時一樣被取消，入唔到貨。
運輸公司被拖數，亦因為信用額冇咗，連車隊入油嘅錢都冇。
油站東主被運輸公司拖數，連油站油缸都空空如也。

大家可能會問：「不過以上只係本地問題，貨可以到港，落貨有幾難？」多都唔講，今時今日全球銀行同業拆息不斷推高，原因就係銀行與銀行之間冇晒信任。

相信大家都知道，海上貨運非常依賴Letter of Credit（LC）去運作。Letter of Credit呢個系統要運作，就必須要國際銀行與銀行之間互相信任。一旦銀行互信蒸發，世界各地出入口商之間嘅貿易就會停頓，食物供應鏈都不會例外。

特區政府話會用盡彈藥解決問題，唔通講緊防暴警察？