彈得太急咁就彈完？

事有蹺蹊。前晚，花旗國道指臨收市前十幾分鐘，由升三百幾點突然快速下跌，收市不但升勢不保，仲要埋單跌74點。前日同大家講過我哋嘅鎮報數據之寶「蘋果散戶指數」，亦提示大家個散戶指數喺舊年十月開始嘅跌浪中，第一次呈現入市訊號。

所以我禮拜三就話，如果「今次冇唔同」就可以入市，因為呢個升浪應該會幾勁。

今次純粹「死貓彈」

不過大家要知道，成個一年長熊市嘅低位──恒指10676點嚟計（即係啱啱禮拜一嘅低位）。喺短短嘅3日，恒指已經反彈超過34%。34%喎！

不過因為反彈速度實在太急，我絕對相信呢個純粹屬於「死貓彈」。即係喺國金二期嘅天台拋隻貓落街，都會彈番上十幾廿樓。不過彈完就……

大家可能會問：「你哋個『蘋果散戶指數』唔係好勁o架咩？又話會升？」我想提醒大家，喺「蘋果散戶指數」歷史當中，入市訊號最強嘅一次，係九一一恐怖襲擊之後嘅禮拜。

相信大家都記得，嗰次熊市最終要到03年先至跌完，但如果你有跟住散戶指數買，同埋識得彈到咁上吓落車，係可以贏幾十個百分點。

其實，好多人將呢個拆倉潮嘅源頭，歸咎啲對冲基金。雖然我話唔只佢哋要減低借錢槓桿率，全世界都要。不過，好多人話對冲基金要減低槓桿率嘅最佳理由，係因為投資者要贖回，呢個結論我就有異議。

拆倉潮源頭在投行

我覺得，對冲基金要減低槓桿率嘅最大理由，就係一路以嚟，借子彈畀佢哋掃射嘅最大「軍火供應商」，即係嗰啲投資銀行。相信大家都知道，美林、貝爾斯登被商業銀行吞咗，而大魔、高盛為咗可以被政府接濟，都攞咗商業銀行牌照，投資銀行家變成bank teller。

當投行變商行，最大嘅分別係乜？

如果你話係「公司文化」，我只可派舊膠畀你，仲要係硬嘅。

投行同商行最大嘅分別，除咗啲投行女職員索好多之外（恒生銀行例外），就係手上資金去經營嘅槓桿比率。投行可以做到二、三十倍，商行最多得12倍。所以投行一變商行，就要瘋狂call loan。

今浪非理性拋售，可能又係條例、官僚作怪。