買得

前日禮拜一，孫柏文話過股市就快見底，不過就叫大家唔好咁快入滙豐（005）。嗰日滙豐就跌14.7%；不過到噚日就已經彈番上去，事件發生嘅速度，快到要用twitter SMS去個網上日誌blog到。

博撈底有指數可跟

點都好，有啲錢真係好難搵，撈底絕對係嗰啲膽大包天、身手不凡嘅人先做得到。不但要唔怕接由高空跌落嚟嘅大菜刀，仲要身手好到接嘅時候，可以捉到個刀柄。不過我覺得，前日七十幾蚊買到滙豐嘅朋友，都要驚埋呢幾日，先至可以舒口氣。

其實，有一個非常重要嘅指數數據，已顯示今個禮拜可入市。呢個指數唔係啲外國嘢，係個百分之百陀地指數，而更重要係根據呢個指數做買賣，贏錢準繩度相當高。

乜嘢指數咁巴閉？咪就係我哋《蘋果日報》嘅「蘋果散戶指數」。

呢個指數係一個典型外國人好鍾意做嘅投資者意向指數（Investor's sentiment indicator），而幅度就會由最樂觀正面（+50），至最悲觀負面（-50）。

一般而言，呢啲投資者意向指數嘅運用方法，都係屬於「反方向」（Contrarian）投資哲學派別。即係「人人睇淡，就入貨；人人睇好，就出貨。」

由98年開始，我哋每個周末做抽樣電話調查，跟住禮拜一公佈。咁多年嚟，散戶最悲觀嘅一次調查，就係喺九一一恐怖襲擊之後嗰次，指數達到（-30.9）。我細心翻查紀錄之後，原來只要指數每次跌穿（-17），跟住你去買升，一個月後就有錢贏。

按往績贏錢機會高

自從04年之後，呢4年嚟「蘋果散戶指數」都未試過跌穿（-17）。直至上個禮拜。如果大家有留意禮拜一嘅《蘋果日報》財經版，就會發現「蘋果散戶指數」係（-19）。根據歷史，即係買得。

啲人話做投資，最危險嘅4個字係「今次唔同 This time is different」。如果你跟咗「蘋果散戶指數」做買賣，就希望今次同以前冇唔同。

--------------------------

Extended reading...

蘋果散戶指數 explained

Here's a chart. Up till April 2006