四級投資者 你係邊級？

相信大家同孫柏文一樣，都聽過啲做嘢歷久冇事嘅人講過：「呢個世界做乜嘢都好，最危險就係識啲唔識啲。識嘅嘢得半桶水走去做，遲早出事。」呢個簡單智慧，當然適用於投資之上。

不過，除咗以上「唔好半桶水」之外，由我細細個鍾意睇跑馬開始，早已聽過冠軍練馬師、馬評家董驃叔叔講過：「馬場專收叻仔。」如果我冇解讀錯，即係如果你叻得滯，始終會有一日出事。呢個見解我覺得連股票市場都啱用。

其實，除咗以上兩個級別嘅投資者，仲可以加多兩級，變成有系統嘅《金手指》四級投資者分級制。

最低級就係「唔識」，之後就係「半桶水」，跟住就有「識」，最後亦係最高級嘅有「叻仔」。

用之前雷曼迷債做例子。

最低級例如孫媽媽呢類「唔識」嘅投資者，不單止唔識乜嘢係迷債，仲要知道自己唔識，點sell畀佢都唔會買。所以喺雷曼迷債事件中冇事。

「叻仔」級輸身家

跟住就有啲「半桶水」投資者，聽到有啲乜嘢信貸評級公司，話呢啲迷債嘅評級好高、好穩陣，就將自己一大部份嘅身家買落去。結果雷曼執笠，迷債出事，政客登記，上街示威。

嗰班「識」嘅投資者，當然好似啲「半桶水」投資者咁，聽過信貸評級公司畀嘅評級。但佢哋就係因為識，知道呢幾年啲評級漸出問題，又聽過雷曼可能有事，所以當銀行職員sell啲迷債時，佢哋只要反問番幾個關於迷債嘅技術性問題，令啲銀行職員覺得：「都係搵番啲半桶水投資者算數。」就可以成功擊退啲職員，逃過一劫。

相信大家都會問：「咁啲『叻仔』級投資者呢？」叫得做「叻仔」，就當然聽過雷曼可能有事，又一早唔信啲信貸評級。不過同佢講雷曼有事，佢就會話：「有事？聯儲局、伯南克都會救啦！系統性風險呀！就係因為有好多人睇唔到呢個政策點，所以迷債需求一定被壓低，回報同值博率一定高！」之後，仲因為銀行貸款利息成本，比迷債嘅回報少，叻仔就有咁多借咁多，樓都押埋，諗住嚟次利息套戥。最後雷曼執笠，輸身家。

咁你又係邊級投資者？