Wednesday, December 03, 2008

一夜拉晒折扣的士

孫柏文真係估唔到,一場泰國政治示威,最終威脅嘅政權係我哋特區政府。一場非暴力抗爭,居然流咗香港人嘅血。

其實,如果唔係咁多特區人滯留泰國,最後仲遇上車禍,政府今日面對嘅最大政治問題就會唔同。

冇「滯留泰國 + 車禍」問題,又會係咩問題?肯定就係因為折扣的士出現,所以政府推出「市區的士有、新界的士冇」嘅「短加長減」的士收費改動。

多都唔講,淨係因為由機場出發去偏遠新界地方時,搭市區的士平新界的士好多,搞到新界的士忽然冇晒生意衍生出嚟嘅民怨,已經係好大嘅政治問題。

「短加長減」係對付長途折扣的士嘅政策,而因為長途乘客目的地或起點大多數都會包括市區,基本上折扣的士係市區的士嘅「家事」。不過政府應對嘅政策,居然害到無辜嘅新界的士,死未?

其實,「短加長減」係想抄襲折扣的士搭長途比較平嘅效果,亦因為出發點係咁,所以一定失敗。對於坐私家車嘅高級官員,折扣的士嘅神髓就係「平」,其實對乘客嚟講,真正嘅神髓係「時間換折扣」。

Call同等折扣的士係要時間,現在一刀切「短加長減」,只令嗰啲想有即時上車快感嘅乘客,無端端着數咗。

短加長減累新界的


行政機關搞咁多嘢,係因為冇能力正面回答「究竟折扣的士係咪唔搭得?」呢個問題。

所以我建議,不如一夜拉好多折扣的士司機同乘客,揀有代表性嘅例子告上法庭,不過同時資助佢哋打官司。特區有個三權分立、互相制衡嘅美麗機制,折扣的士最終係咪唔搭得?等官判。

4 comments:

  1. 啱啱亦睇緊你喺 Money Cafe 講嘢。十分同意你所講,因為我都係揮手黨。一係唔搭的士,搭就一定係想貪方便,一揮手就會截車。有得減價當然好,冇得減我亦唔會唗時間等八折的。家下已經好忙,時間唔應該浪費喺等車度。

    ReplyDelete
  2. 喂,咪玩喇!今晚一落機就係機塲截唔到車返屋企,搭到機鐵又遇上堵塞跑馬地,都係返唔到屋企!

    呢個係乜世界吖!的士大佬,我雖然同情你,但我想返屋企吖...

    ReplyDelete
  3. 特區有個三權分立、互相制衡嘅美麗機制,折扣的士最終係咪唔搭得?等官判。
    >>>>>

    如果特區政府有自信/量度信任法庭,
    雷曼單野就應該put上庭, 睇下銀行是否誤導、政府是否出錯, 苦主要承受大責任 ?
    唔駛靠嚇逼銀行回水, 結果搞出大頭彿。

    曾生話尊重法治, 睇怕都係葉公好龍。

    ReplyDelete
  4. I see this taxi issue has legs...

    As they say in my business.

    People do care more about things that cuts close to oneself.

    ReplyDelete