Friday, December 12, 2008

王維基如何打爆陳志雲

以前孫柏文做分析員時,因寫嘅報告不時被老闆批評為「flowery language」,又因經常被老闆問:「咁樣寫嘢,你應該去做編劇呀?」

所以我去演藝學院讀咗個初級編劇課程,睇吓老闆有冇睇錯。

直播開會有收視

上第一堂,導師就話:「張力就係drama。」而入咗傳媒做之後,更明白有戲劇性就自然多人睇呢個道理。現在邊間傳媒機構最有張力?肯定係亞視。

禮拜二新行政總裁王維基同新聞部職員開會,禮拜三啲職員放料畀報紙spin佢係衰人,到禮拜四又見到王維基喺專欄還拖counter spin。

淨係咁睇已經覺得王維基唔掂,咁正嘅嘢居然益晒我哋啲報紙,應該留番畀亞視。

橫掂王維基都喺佢嘅專欄話:「第一步開始,我就會誠實、坦白、開放。我的底線是,沒有東西是不能公開的,你以為我會不知道今天說的話,明天會刊登於報紙嗎?」所以就不如將佢同職員開會做現場直播,佢哋雖然已將開會片段放上Youtube,不過冇理由唔搵埋錢。

叮走高層真人騷


到直播時王維基為提高張力,就可學Donald Trump喺《飛黃騰達》咁問:「主播A,點解留你唔留主播B?」

跟住就睇主播A、B互插。

之後,王維基就會指住其中一個佢覺得唔掂嘅主播話:「You're fired!」

最後仲有部的士畀送走被炒員工,做埋訪問攞感想。

咁嘅真人show嘅收視率,一定贏無綫。

到時候,陳志雲再上幾多次雪山、食幾多個飯局(hat tip moneycafe),都會被王維基打爆。唔通我舊老闆啱咗?我應該去做編劇?

1 comment:

  1. 咁折墮的橋你都想到,果然係PAKMAN
    正Ass

    ReplyDelete