高油價下政府做啲乜

正當一個政府嘅行政機關，由上至下都唔係選出嚟。佢哋想推政策時，面對一個全面開放嘅傳媒，往往需要做大量民意調查，攞啲對政府有利嘅結果。如果民調結果「唔靚」，政府就會輸打贏要。

如果個民調喺網上做，網民睇到即時結果，政府分分鐘會成個民調抽起。大家一定估，孫柏文講緊香港政府。錯！我講緊歐盟政府。

噚日，有封嚟自立陶宛嘅電郵，嗰位叫Silenas嘅仁兄話，歐盟委員會主席網站，做關於生物柴油政策民調。點知超過九成回覆，都係反對生物柴油，啲官見唔對路，即刻抽起個民調，跟住話個民調俾人騎劫咗。大佬呀！九成人反對，絕對正路。唔好話啲要捱貴糧嘅市民反對，淨係嗰啲真正識嘢嘅環保分子，知道生物柴油喺生產同製造過程中極之唔環保，所以反對，都已經夠九成人。

我作為一個深信環保嘅人，睇見今時今日嘅油價，真係有啲安慰。只要油價冇政府政策扭曲，全數轉介消費者，全球60億人就會自發諗方法，將每滴油，每嚿炭用盡。

肥人應加燃油附加費

例如，大家作為《金手指》嘅fan屎，都知我唔係細隻。現在喺花旗國，就有人吹話肥人搭飛機，可能要收多啲燃油附加費。一吹，就有反歧視嘅人要求政府介入，禁止航空公司有咁樣嘅政策。我作為肥人，都支持畀多啲燃油附加費，始終架飛機載我要用嘅油，真係多過載啲100磅有找嘅港女。

一向以嚟喺花旗國，啲環保分子都要求政府立法，迫啲汽車生產商造慳油車。今時今日仲使迫？又或者啲航空公司，已經將啲最食油嘅舊飛機，全面淘汰。又同時改變飛航路線，盡量將油用得有效率。

所以，噚日見到貨車司機喺皇后大道中示威，要求政府對高油價「做啲嘢」。求神拜佛政府千祈唔好。我希望嗰啲只係識令人蛙牙，反對膠飲管嘅「環保人士」，知道下次有司機示威時，出嚟對質。環保硬膠大戰搵食車司機？有趣、有趣。