問題少年 太多問題

噚日，孫柏文同大家分享過幾日前一位中學生寄嚟嘅信。佢問點解政府搞到佢日日返學都要唱國歌、睇升旗禮，話要佢愛國。跟住特首就話選擇入其他國籍嘅人，都可以喺日日強調要愛國嘅政府裏面，擔任要職。我都係嗰句。我唔知。我呢代打上嘅香港人，可能比較務實。唔會點思考呢啲矛盾，不過後生嘅一代，就可能會。

噚日同大家分享過呢位中學生帶出嚟嘅矛盾之後，就有其他後生仔女，寄信嚟分享咗困擾佢哋好耐，政府製造出嚟嘅矛盾。

唔同人有唔同機制

第一個問：「我今年開始可以投票，亦有登記。好期望喺立法會選舉中投票。不過，點解立法會就要『多議席單票制』，而區議會就要『單議席單票制』？兩個機制都有利有弊，不過政府衡量過之後，點解唔解釋吓邊個好啲？理由係乜？點解唔係所有選舉用同一制度？」我答：「都係嗰句。我唔知。」

第二個問：「見到海關，因為有人將電子遊戲機改機，令到啲可以去玩翻版遊戲，所以去拉人。咁係咪所有人改、製可以玩翻版嘢嘅機，都應該拉呢？我中學有個好寸嘅人，買咗部要改機先至可以上台打電話嘅iPhone，點解唔拉佢？政府可唔可以解釋吓？」我答：「唔知。」

第三個問：「有立法會議員要求政府，公開副局長同局長助理嘅薪酬。因為現時，政府淨係講過，佢哋兩個級別可以有嘅最高同最低薪金。不過，點解立法會議員同局長本身，又會劃一薪酬？彈性處理薪金，可以明白。劃一又有理據。點解一部份人要面對一套薪酬機制，另一部份人就唔同？」我答：「我都想知。」

太多矛盾等待回應

第四個問：「點解送免費膠袋，就要收膠袋稅，不過免費報紙就冇？免費膠袋就驚人會浪費，咁每日要印幾百萬份免費報紙呢？」我答：「免費報紙要抽稅？Good good。」

第五個問：「我家中婆婆，淨係識講鄉下話。佢又需要人照顧。點解唔可以請鄉下嘅同鄉來港做家庭傭工，只可以請唔識講中文嘅菲律賓、印尼人？」我再加問：「咁嗰兩個國家嘅華僑就ok？」

太多矛盾。出嚟答吓。唔該。