買定put輪等睇戲

「我哋預期，美國金融市場會喺幾個禮拜之內，完全崩潰。」以上呢句說話嘅來源，係從荷蘭報章De Financiele Telegraaf，用荷蘭文報道富通銀行主席Maurice Lippens嘅說話。噚日我第一次見到以上句話，係喺一個花旗國網站，用英文寫。因為句說話實在太震撼，孫柏文就搵番個原文，再用好幾個電子繙譯網站繙譯。雖然冇個繙譯係一模一樣，不過「美國金融市場」、「喺幾個禮拜之內」、「完全崩潰」等嘅詞句，就個個繙譯版本都有。

銀行籲做防風措施

睇淡唔係出奇，睇得好淡就連孫柏文都係，因為如果唔係覺得花旗國金融市場會出現崩潰情況，都唔會不斷叫大家一注獨贏買白銀。不過我當年叫買白銀，雖然擺出升12倍嘅目標價，但畀個目標價10 年時間去實現，Lippens主席話嘅係「喺幾個禮拜之內」，如果係真，買白銀做保險，就不如加碼買put輪，入咗貨後等睇戲。

其實，富通銀行要大幅折讓股價去集資，所以個主席要講到咁甘先至可以解釋，點解要大幅折讓同咁急去集資，但唔淨係富通銀行做以上推測，巴克萊、皇家蘇格蘭等，呢啲係咁俾穆廸降低信貸評級嘅銀行，都紛紛建議佢哋啲客戶，要做足十號風球嘅防風措施，因為「幾個月之內會爆鑊」。

美聯儲局招數盡出

雖然有咁多睇得咁淡嘅預測，被醒目仔充斥嘅《金手指》fan屎群，一定有醒目仔諗：「個個都睇淡，仲唔係時候買升？起碼都係時候博反彈。」呢個睇法唔係冇根據，不過今次花旗國股市，已經係從1月（法興）、3月（Bear Stearns），第三次挑戰低位。

1月聯儲局就即刻減息0.75厘。
3月聯儲局就將投資銀行同佢哋嘅負債，都孭上身。

今次，仲有乜嘢招數可以出？

冇嘅話，挑戰第三次先穿嘅支持位，一穿就好大鑊。仲有，成交額完全唔對路，完全唔似可以博反彈嘅支持位。都係嗰句，買定put輪等睇戲。