靠投資銀行搵錢要……

上個禮拜，好多傳言話有事嘅投資銀行雷曼兄弟，卒之成功集資60億美元，推高自己手上嘅淨資產同現金。最勁係，佢哋原先對股價有折扣嘅批股活動，最後因股價下挫，買家要出溢價，都可以成功，唔好話啲sales唔勁。

佢哋今晚公佈業績，如無意外，將會蝕一早已唱通街嘅28億美元。當然，上任冇一年嘅雷曼財務總監，就因為上個禮拜四被公司管理層降級，無緣參與業績公佈。

孫柏文呢幾日對住雷曼嗰張，由80元跌到廿幾元嘅一年期股價走勢圖，諗咗好多嘢。究竟投資銀行嘅出現，邊個人有着數、搵到錢？

如果睇股價圖，好容易覺得，投資銀行唔係啲股東有着數。不過就算唔睇股價圖，大家只要問自己，如果有壇生意，你出本金後做30倍槓桿，回報只係本金嘅百分之廿幾，你會入股做股東咩？

你可能話：「做30 倍槓桿，廿幾巴仙回報，只要夠穩陣，冇問題！例如有兩種風險一樣嘅投資項目，不過有回報差別，就可以一拋空另一買入做套戥。」我知！例如搵兩種都係風險評級AAA嘅債券！最弊，現在唯一有用嘅AAA標籤，就係擺喺電視機遙遠控制裏面嘅電芯。做投行股東？好辛苦。

投行僅員工搵到錢

靠投行搵錢，做員工先得。每年大家聽到啲幾十個月花紅，全部都係投行員工攞。仲有，做員工只需求神拜佛，到年尾冇事，現金花紅就可以穩袋。

你可能話：「驚員工只望年尾冇事，咪發認股權畀佢哋，等佢哋同股東同一條船。」理論上係。不過，如果走火入魔、濫發認股權，最後就會攤薄股權，除非積極回購。

後果係點？《紐約時報》話，雷曼兄弟對上13季，盈利總和係119億美元，但就用咗118億美元回購公司股份，股份總和仲有升無減。知道點解啲花旗國公司員工，咁抗拒修訂認股權會計上嘅成本啦！