「白銀拉登」重出江湖？

各位白銀戰隊成員，孫柏文作為白銀戰隊隊長，今日有重大嘅好消息。我哋白銀聖戰軍嘅精神領袖，可能重出江湖，又披甲上場再同濫發鈔票嘅紙幣狂魔決一死戰。

咁究竟呢位「白銀拉登」係邊個？就係70至80年代，大手買入白銀，睇住銀價由1 美元1盎斯，升至50美元嘅亨特兄弟Hunt Brothers。當年佢哋見到花旗國總統尼克遜，因為濫發鈔票，不能維持美元同黃金掛鈎嘅關係，決定脫鈎，推斷美元會不斷貶值。又因為當年喺花旗國擁有黃金係犯法，所以就決定買入白銀去保護自己手上資產嘅購買力。

最初，佢哋只係買實貨白銀，非常小心。點知後尾衰貪心，進入期貨市場，借錢炒白銀。買貨之多，令政府有藉口立例禁止任何一個單位持有咁多貨。亨特兄弟被迫嘔番啲白銀出嚟，最後仲要被美國政府控告操控市場，最終要宣佈破產。

雖然家族有一兩個成員喺嗰役破產，不過家族嘅生意就繼續運作。佢哋嘅家族生意，就係開採石油，公司叫做Hunt Oil。大家都知油價近年係點，亨特家族仲有大把喺手。

賣家族資產降風險

上個禮拜，亨特家族就將冇上市嘅Hunt Oil成功賣出，作價42億美元。已經有人推斷，淨係為分散風險，又遇上好多以前被譽為好安全嘅投資工具，例如AAA評級嘅債券，其實都唔安全。亨特家族絕對有理由重返白銀市場。

噚日同利世民傾過，雖然佢話亨特家族應該見過鬼怕黑，唔會再買白銀。不過我相信佢有咁嘅推斷，只因世民當年喺花旗國北部讀大學，對亨特家族呢啲德州人嘅脾性唔清楚。德州人係啲咩人？現任花旗國總統布殊就係最好例子。

當年佢老竇下台之後，出訪科威特。薩達姆派人想刺殺老布殊。雖然失手，不過小布殊絕對冇忘記嗰個想郁屋企人嘅仇家。之後係點，我毋須再提。只能講句，對於德州人嚟講，家族報仇，廿年未晚。