Wednesday, August 06, 2008

再奉曾淵滄之命講石油

上個禮拜四,曾淵滄教授喺佢嘅專欄,公開呼籲財經版老編,叫我寫多啲關於石油同油價嘅嘢。咁喺前日,我就奉命講石油。我嗰日首先強調,短期嘅油價走勢,絕對係靠估。

如果好似曾教授喺上個禮拜四咁講:「大市……一跌一升,全是由美股拉着鼻子走。美股則由石油價格拉着走,或者再加上個別企業的業績所影響,但主導力量還是石油價格。」咁孫柏文就有一個壞消息,預測單日股市走勢,就會好似我以前股票行老闆話齋:「股票、股票,都係估估吓。」

商品大王認九流炒家


想預測油價走勢,只可以做啲比較長遠嘅預測。如果一定要估吓短期走勢,我就要提醒你,商品大王Jim Rogers成日都話自己係「九流炒家」嘅原因,就係簡單直認自己不能夠預測短期走勢。咁你叻唔叻得過商品大王?

前日講過,長遠嘅預測當然又係供求決定。禮拜一開始講需求,我話人類使用石油嘅方法,越來越有效率。每桶石油帶嚟嘅快樂,越來越多,所以先至會肯出越來越高嘅價錢嚟買。

不過喺禮拜一亦講過,如果政府進行補貼,當用家毋須面對油價嘅升幅,使用效率就唔會提升。而因為取消補貼,會令市民反感,所以全世界好多政府都會繼續補貼。特別係啲「世界焦點」嘅地方,因為市民表達不滿嘅方法,好多時候都會示威遊行,所以管治「世界焦點」嘅政府(例如奧運前嘅大陸),唔會停止補貼。

不過就算一個政府,對使用石油嘅效率置諸不理,但因補貼始終非常昂貴,一旦一個地方唔再係「世界焦點」,補貼就可以減少。所以禮拜一就推介「奧運後概念股」中石化(386)。

補貼扭曲石油需求


其實,世界各地嘅政府補貼,已經嚴重扭曲石油需求。根據石油分析員非常尊重嘅英國石油公司BP嘅數據統計部,07年有九成幾石油需求增長,都係來自有石油補貼嘅地方。所以一日仲有地方政府大規模補貼,就算例如美國等冇補貼嘅地方,需求減少,全球總體需求都會繼續增加。

要估需求,就要估補貼。

2 comments:

  1. will you consider the factor of deceasing cost of nuclear power?

    ReplyDelete