恐襲香港的永久影響

上個禮拜實在有太多事發生，孫柏文今日會逐一講吓。淨係禮拜五，美滙指數大升 1.27點，都好多年未試過一定要講。

不過未講金融市場之前，我想講吓上個禮拜喺特區發生嘅幾單疑似恐怖襲擊事件。

大家可能會問：「好似得銅鑼灣地鐵站有煙霧彈嗰一單。仲有其他咩？」有。大家可能唔知，我哋《蘋果日報》喺網上有個叫蘋果動新聞嘅服務，為讀者提供即時新聞同新聞短片。喺上個禮拜，有段新聞就成為蘋果動新聞正式啓動一年以嚟，單一最高收視嘅短片。

邊段新聞？咪就係鐵板活塞男。

拒坐sit up板

如果你唔知邊個係活塞男。唯一解釋就係你喺上個禮拜，不單只唔喺特區，仲要去咗格魯吉亞。事緣有條友，喺公園一塊俾人做sit-up、滿佈排雨水圓孔嘅鐵板上，可能做緊掌上壓，又可能訓練緊條腰。

做做吓，忽然發現自己條陽具插咗入個窿，跟住卡住咗，最後要報警求助。

大家可能會話：「呢的都算恐怖襲擊？」一定算。仲要比銅鑼灣地鐵站嗰單，對社會影響更深遠。

點解？不如你問吓你隔籬嘅港女，會唔會因為上個禮拜嘅事，唔再去銅鑼灣地鐵站。

跟住再問佢下次去公園，會唔會坐落去啲 sit-up鐵板上。咪就係囉！

點都好，大家現在知蘋果動新聞嘅存在，不妨多的上去。因為Teresa同我有份一齊做嘅財經show，你貼股我教路，喺每個交易日下午四點半，都會喺蘋果動新聞finance.appledaily.com度睇到。我哋個show一定係全港最free嘅互動股票節目。

捱過拆倉潮

講番上禮拜五，美滙指數大升。美元升，港股、金銀、原材料、外幣一律大跌。由我喺06年3月6日開始寫金手指以嚟，美滙指數未試過升穿200天平均線。不過，喺上個禮拜，就升穿咗。

好多人話美元基本因素改變，我就話冇。變都係歐元變，金銀同美元關係同兩個禮拜前比，都係一模一樣。

咁上個禮拜又點解釋？咪就係好似以前利差交易拆倉時一樣，突然個個要賣晒啲嘢去還借嚟投資嘅錢。

各位白銀戰隊成員，隊長只可以話，捱得過今個8月拆倉潮，想窮都難！