SIV該死 滙豐為乜上身？

相信大家噚日已經知道，孫柏文曾經叫過大家一注獨沽嘅滙豐（005），卒之出招去應付佢旗下管理嘅兩間special investment vehicle（SIV）。滙豐點樣搞掂呢兩間SIV，或者搞掂嘅方法啱唔啱，遲啲先講，我首先想解釋SIV究竟係乜。

SIV基本上係銀行成立嘅獨立公司，呢間公司首先會搵投資者，問吓佢哋有冇興趣夾份入股。間公司就由銀行自己管理，先問人入股做股東，集資例如100萬。

之後再向債市舉債，例如借900 萬，以發出短期例如4個月嘅債券借錢。每4個月就會借一批新嘅去還舊一批嘅錢。假設，向債市舉債900萬嘅利息成本係5厘，亦即每年利息開支係45萬。

成功得到1000萬之後，佢哋就會買啲不同嘅資產。可能啲資產因成交不足，又或風險較高，回本期較長，所以就算風平浪靜時，呢批資產嘅回報就都係6厘。 1000萬等於有60萬嘅收入，扣除利息支出45萬，等於有15萬收入。

貴客點可以得罪

因為係銀行管理嘅，佢都要收管理費，咁就可能要收番收入嘅20%作為管理費，即係3萬。

有剩嘅派畀股東，即係等於12萬，對於原先投資100萬嘅股東，即係12厘嘅回報。

買6厘風險回報嘅嘢，居然有12厘嘅回報。所以呢個如意算盤咁多人受落。因為佢理論上獨立於銀行，監管機構唔會煩。咁嘅情況下，監管機構向公眾表示做咗啲嘢，銀行同時又可以收取管理費。表面上皆大歡喜。

最壞情況，就係SIV沒有能力每4個月借新錢去還舊錢。理論上SIV收場，資產被拍賣，首先還錢給債權人，如果有剩就歸股東。

理論上搞SIV嘅銀行毋須上身，咁點解滙豐又要？可以投資落呢間SIV嘅投資者，應該係滙豐非富則貴嘅顧客，唔可以激嬲。如果滙豐唔出手救SIV，迫 SIV「賤賣」資產，餘下嘅股東會覺得滙豐出賣佢哋，怒炒滙豐。

亦都唔知借錢畀SIV嘅人，會唔會因為今次SIV唔肯還錢，而同滙豐一刀兩斷。最後就係滙豐本身擁有類似SIV裏面嘅資產，如果「賤賣」價唔靚，滙豐就要重估手上資產值。所以滙豐要攬個SIV上身，雖然不至於話引火自焚，但係都係肯定高風險，聽日再作討論。