美電視劇就快冇得睇

今日，孫柏文想向大家發出警告，如果你係花旗國電視劇迷，你可能會喺12個月之內，冇新劇睇。不過講點解之前，想同大家重溫一下歷史。

特區上排出現咗一場非常激昂嘅工潮。大家都應該記得，為脆弱混凝土，建構火紅鋼鐵支架，催生一棟棟摩天大廈嘅扎鐵工人，為生計，為尊嚴，走出嚟抗爭罷工。不過我擔心，就算爭取到名義上嘅加薪，工人如果面對建築科技或製造流程嘅不斷進步，特區建築界對扎鐵工人嘅需求會繼續萎縮。如果供應唔減，實袋日薪亦只會繼續跌。

電視編劇工會醞釀大罷工

咁大家可能會問：「扎鐵工人同美國電視劇，有乜嘢關係？」對於一個21世紀人，房屋同娛樂都係必需品。不過就算兩種產品都係必須，絕對唔等於今日生產流程當中嘅中堅工人，他朝有同等嘅地位。

扎鐵工人因預製造件嘅興起，報紙執字粒員工因電腦排版嘅廣泛採用，百科全書銷售員因互聯網出現，都冇因為樓要繼續起，報紙要繼續出，小朋友要繼續抄功課，可保得住飯碗。

喺花旗國荷李活，電視編劇工會正醞釀一場大罷工。表面上係因01年決定嘅合約，編劇喺當時新興DVD嘅收入分贓覺得唔公平。今年，編劇要同啲電視台談判，決定未來互聯網出售劇集收入嘅分配，不過談判決裂。如果冇進展，啲編劇就會喺11月1日開始罷工。

而花旗國電視劇一路以嚟嘅行規，就係喺秋天開始播新一輯電視劇，劇一路播，編劇一路寫。不過如果11月1日開始，編劇封筆，今年秋天就會冇新劇播。

真人騷收視高編劇需求降

大家可能會問：「世界各國嘅電視台，都因互聯網奪去收視，電視台冇新劇播只會更加大鑊，佢哋唔會屈服於編劇嘅要求之下咩？」照常理係。不過電視台發覺，近年最高收視嘅節目，好多都係例如American Idol或Survivor嘅Reality Show，而呢啲「真人騷」，對編劇嘅需要唔大，所以電視台已經唔係好想同編劇妥協。

最弊啲電視台高層，就連對「電視」呢個概念都開始出現信心動搖。所以希望完全重新評估如何繼續搞「電視」呢門生意。《靚太唔易做》、《CSI》、《24》嘅fan屎，有心理準備啦。