拋空輸到冇錢買餸 點算？

今晚，花旗國聯儲局議息。如無意外，應該減息。大家作為《金手指》嘅fan屎，都應該知道孫柏文除咗叫大家「一注獨贏買」白銀同中油香港（135）之外，仲叫過大家「一注獨沽賣滙豐（005）」。

如果今晚減息，銀行股、特別係對國際融資市場非常敏感嘅滙豐，就應該升。沽咗滙豐嘅fan屎，就同我一樣暫時繼續輸錢。

輸錢，大家都唔想。不過因為想賺錢，而承受風險，輸錢絕對係一個可能出現嘅結果。所以，投資界往往想發掘一啲必勝嘅投資項目。必勝嘅投資，番鬼佬叫做 arbitrage，中文翻繹成為套戥。

今時今日，大家可能會話「套戥」好容易搵。求其打開《蘋果日報》財經版，睇吓邊一間公司隻H股落後佢嘅A股就得啦。

我今日想同大家講，特區其實有個仲穩陣嘅套戥形式投資項目。大家可能會問：「咁着數？」冇錯！就係咁着數！仲要如果有人嘗試打破呢個套戥投資，就會有好多董建華式好心做壞事嘅人，出嚟幫你護航。呢個咁着數嘅套戥投資，就係如果你喺政府私有化領匯（823）之前，租咗舖位做酒樓。

偏離需求就可套戥

今時今日，任何一間酒樓嘅收費都係跟市價，即收入跟需求情況。不過，如果你喺領匯嘅商場租咗舖，咁你面對嘅租金成本就會遠比市場低。到時候，你根本毋須自己落手落腳經營酒樓，只要你外判就可以。

外判商就會以市值租金，畀錢你，你跟住交平租畀領匯就得。如果領匯想直接租畀外判商，繞過你呢個中間人，你只要搵幾個「社會運動家」番嚟。將「打壓領匯」嘅工序外判畀佢哋，佢哋就會好有效率咁安排啲撈油水政客，同埋啲貌似記者嘅「翻印新聞稿社會主義機器」出嚟反對領匯。幾開心啊！

講番輸錢。早幾個禮拜，隔籬馬經版嘅高乘駿兄話，有個賽馬日身邊朋友問佢，騎師白德民冇馬贏，係咪變咗我「白銀文」嘅大佬──「白果民」？白德民係咪「白果民」我就唔知。不過，以前我跟老竇入馬場，散場時老竇就會叫我「白果文」。「白果文」、「明燈」都係有異曲同工之用。老竇笑話，如果我已經成家立室，分分鐘每個賽馬日都輸到冇錢，要問大耳窿借錢買餸。

不過，以今日嘅融資科技，大耳窿已經冇市場。因為大家只要申請張領匯信用卡，就可以喺領匯旗下嘅街市購買「買餸現金券」。仲要九五折。所以如果你都係「白果X」，都係申請張安全啲。