阿里巴巴點解值300倍PE

噚日，有間公司令孫柏文百感交集，今日一定要同大家分享。如果大家有留意，噚日有間叫做阿里巴巴嘅公司上市，編號1688。

大家可能會問：「呢幾年，有咁多間公司嚟香港上市，點解要特登寫呢間？」我今日要寫阿里巴巴嘅原因，係因為佢哋係一間非常偉大的公司。佢哋主要有兩大產品，而兩種產品都係對人類非常重要。

產品有驚世貢獻？

阿里巴巴嘅管理層，深深明白人類過去嘅歷史。清楚知道自從文明開始，人類飽受戰火嘅煎熬。人類嘅科技，就算發明嘅人係希望佢嘅科技能夠促進人類生存力，最終都會被好戰者攞去打仗，令歷史中無數無辜嘅平民百姓被殺，血流成河。

甚至乎科技越係進步，無辜要死嘅人就越多。所以，平民百姓對能夠繼續生存嘅需求非常之大。

阿里巴巴就係睇中呢個商機，喺幾年前推出一種叫做「世界和平」嘅產品，英文叫World Peace。

除咗有「世界和平」呢個產品之外，佢哋嘅管理層亦明白就算世界冇戰亂，人，始終都有終老嘅一日。食物產量增加，公共衞生意識日益進步，工業同交通日趨安全，令傳統延壽方法嘅回報，每下愈況。

魂歸天國嘅理由開始轉變，越嚟越多人因一樣叫做「癌症」嘅嘢，面對死亡。所以，世界各國嘅人對能夠擺脫被癌魔纏繞嘅需求非常之大。

阿里巴巴就係睇中呢個商機，喺幾年前推出一種叫做「癌必治」嘅產品，英文叫Cure for Cancer。

阿里巴巴嘅營業額，就係被呢兩種產品帶動，呢幾年節節上升。市場對於「癌必治」同「世界和平」，未開發嘅需求非常之有信心。覺得當今世上 60億人，都會幫襯阿里巴巴。所以噚日就算阿里巴巴嘅市盈率去到300倍，都仲有人買。

怕者睇錯招股書

等等……乜話！孫柏文睇錯咗招股書？原來唔係阿里巴巴有得賣World Peace同Cure for Cancer。死啦！噚日應該有好多同我一樣嘅人睇錯咗。如果唔係，點會300倍PE都仲入貨？

噚日，阿里巴巴最高見過39.95元一股。如果大家識嗰位喺39.95元買入嘅朋友，希望你可以叫佢打電話嚟《蘋果日報》搵我。我只怕佢係講普通話，因為我嘅普通話好差。