聯儲局 12月必減息

上個禮拜，花旗國聯儲局減息。呢個舉動連牛頭角順嫂都預咗。金融市場參與者關心嘅，唔係當日有冇息減，而係喺未來會否繼續減，特別係12月，咁就要睇吓佢哋會議日出嘅聲明。

啲市場參與者，特別係嗰啲「專家」，睇完個聲明之後，話聯儲局覺得已經冇需要再減息。「打擊通脹」又再次成為首要目標。孫柏文都有睇過份聲明，反覆思考後，發覺呢啲「專家」嘅分析完全冇錯。聯儲局真係想大家覺得：佢哋已經決定冇需要再減息。

不過，我同時發現，聲明嘅語氣似曾相識。聲明當中，最令人覺得，佢哋已經決定冇需要再減息嘅一句係：「The Committee judges that, after this action, the upside risks to inflation roughly balance the downside risks to growth.」特別係用咗balance呢個字，去形容通脹風險同衰退危機已達平衡點。平衡，即係冇需要再做嘢。

誠信一失金爆升

點解我會話似曾相識？原來02年11月6日，格林斯潘主持嘅聯儲局，亦有用balance呢個字。佢哋當日議息，決定減息半厘，由1.75%減到 1.25%。我絕對相信，當時格林斯潘用balance呢個字，唔係因為佢真係覺得冇需要再減息，而係為咗振奮各界信心，惟有硬着頭皮，畀全世界一個「已到谷底，反彈在即」嘅感覺。

當時，好多人話睇死格林斯潘未減完息。最終，經濟繼續有問題，格林斯潘惟有「今日的我打倒昨日的我」，喺03年再減息，減到 1%。

大家可能會問：「02年聯儲局用咗balance呢個字，都咁多人睇死未減完息。最後真係未減完。聯儲局咪面對好大嘅誠信問題？」問得好！大家作為《金手指》fan屎，都知道，如果印紙幣嘅聯儲局失誠信，上帝賜給人類嘅貨幣黃金，就會冒起。如果大家睇吓黃金嘅十年走勢圖，就會發覺，黃金就係喺02年 11月升穿320美元一盎斯嘅多年阻力位。一直升到今日。

伯南克嘅聯儲局，將會面對同一厄運，嚟緊嘅幾個禮拜，會有不斷嘅壞消息湧現。啲壞消息仲要係從紙幣制度心臟地帶嘅銀行業湧出，到12月初，聯儲局必定要繼續減息。紙幣制度誠信破產，黃金、白銀就只會繼續升。對上幾年，啲人買金銀係出於貪念，上個禮拜，我哋卒之正式進入「買金銀係出於恐懼」，出於貨幣貶值恐懼嘅年代。