英航公關肥佬

10月17日，孫柏文寫過《Heathrow's Business Model》，解釋倫敦希斯路機場點樣搵錢，同地鐵（066）一樣，唔係靠載客服務，而係靠地產。地鐵建住宅，希斯路就將機場變成購物中心，收租搵錢。

我寫嗰篇文，係因為有個女同事經希斯路返港，航空公司搞唔見咗佢啲行李。我覺得變走啲行李，係希斯路將搵錢絕技發揮得淋漓盡致。行李唔可以寄艙，吓吓要手提，手提咁辛苦，旅客就會選擇喺機場購物。

反面教材

今日重提舊事，係因為有新發展。嗰位女同事，去信質問航空公司︰英航 British Airways，問佢哋希斯路唔見行李嘅事。英航答話，英國政府對手提行李有好多限制，令到處理寄艙行李「面對相當大的壓力」。我都可以理解。不過，英航嘅公關畫蛇添足，臨尾加多句：「我們建議旅客在開展旅程前購買旅遊保險。」

女同事一見到呢句，就火屎都嚟埋。佢話，首先如果英航有咁講，只係起碼令人覺得佢哋不負責任。最弊，英航冇咁警告過佢。孫柏文作為一個極之負責任嘅傳媒工作者，當然第一時間調查（冇錯，孫柏文──Investigative Journalist）。所以，就派咗呢位女同事做卧底，假扮我嘅俏秘書，去幫我定一張要經希斯路轉機嘅英航機票。

「俏秘書」喺定票過程中，再三問佢哋，如果要經希斯路轉機，喺寄艙行李方面要留意啲乜。點知，個英航售票員只係重複又重複話：「喺希斯路唔使攞行李，喺目的地攞就得。」完全冇提及要買旅遊保險。

講真，我真心相信機場或英航，都唔想特登整唔見旅客啲行李。不過英航啲硬膠公關，不但冇平息旅客嘅反感，仲火上加油。單嘢變成工商管理學「公關」科嘅反面教材。真係唔知啲英航旅客，經過喺機艙內十幾個鐘之後，落機時會否成身膠味。