通脹勢將失控

噚日，滙豐為花旗國業務向股東交代。原先想分析吓。不過，喺小弟落筆嘅呢一刻，滙豐只係公佈咗啲報告。因為「講未來」嘅分析員發佈會仲未開始，惟有聽日先同大家講。

今日，孫柏文想繼續講，深圳啲銀行唔畀存戶攞錢單嘢，因為真係令我好不安。相信大家都知，深圳存戶呢幾日提款面對數額限制，每日不能逾3萬。即係自己錢，唔畀攞。

噚日，打電話畀隔籬思哲兄，問吓佢點睇。佢話：「呢個唔畀存戶攞錢嘅指令，真係由央行發出。政府話係去打擊黃、賭、毒。」

大鑊到要講大話

我一聽就答：「打黃賭毒？Oh please，唔好玩啦！即係某間油尖旺的士高裏面有人索K，香港銀行唔畀攞錢？數額總要好奇怪，攞3萬索K肯定OD死。打黃賭毒？講大話都講得咁硬膠。」

經過討論一番之後，思哲兄同我都決定今日寫呢單嘢。因為我哋兩個都絕對同意，政府話限提款為打黃賭毒，係講大話。

問題就係如果政府講大話，咁真正理由係乜？

而真正嘅理由，點解大鑊到要政府講大話？

第一個解釋方法，就係央行冇現鈔。以前細細個過年，老竇話大陸利是用舊銀紙，因為冇budget印新。現在大國崛起，冇理由冇budget。唔通啲印刷機俾聯儲局同日央行霸晒嚟用？冇理由。

第二係因為想維持銀行體制穩定，不斷提高存款準備金，銀行唔想違規，只好焗住啲存款，當自己係曱甴酒店。不過就將情況變得更加不穩定。試問，如果你喺大陸有閒錢鈔票，仲會唔會放喺銀行？

第三就係央行想控制貨幣供應去打擊通脹。理論上市場上冇現鈔，拖慢交易速度，就可以控制貨幣供應。最弊，好多「見得光」或「唔見得光」嘅進口產品，都係經過深圳。如果有個進口巴西豬肉入大陸嘅商人，貨到不過因對方只收現金，所以無法找數畀佢。啲豬肉喺口岸腐爛，未能進口，豬肉價繼而飛升，通脹更加失控，呢隻鑊邊個孭先？

真係好不安。