和諧壓倒一切

上個禮拜某日中午，孫柏文開緊會，亦將手機校做震機。因為當日嘅會議非常引人入勝，所以有人打電話嚟都唔知。到個會開完之後，先至發現，原來老竇打過電話畀我，亦有留言。

老竇搵我，做仔嘅當然第一時間諗吓，呢排係咪做過啲乜嘢衰嘢（呢個就一定），係咪畀老竇知道咗（呢個就未必），所以打電話嚟「訓話」。點都好，我就聽吓老竇喺留言信箱裏面講乜。老竇：「成十二點幾，你都唔聽電話，你今日放假呀？你仲未起身呀？噚晚又去玩嚟呀？叫咗你唔好成日去玩。」。

老竇繼續話：「孫柏文，你要寫吓「生果金」。呢啲唔鬧吓點得o架，你諗吓寫吓啦。」聽完，一頭霧水。最後，都係打電話畀老竇查個究竟，佢對政府畀老人家嘅福利「生果金」有乜咁唔滿意。首先，大家要知道，我老竇啱啱幾個月前退休。作為一個典型香港人，喺冇乜嘢忙嘅情況之下，就開始打聽究竟點樣可以喺現有架構當中「屈機」game the system，屈啲老人着數番嚟。

生果金歧視？

原來，我老竇嬲政府嘅「生果金」政策。佢話：「生果金唔係用嚟敬老咩？敬老有分貴賤咩？點解65至70歲嘅生果金要歧視？要睇收入？要睇資產？我係咪去到65歲時，一鋪過買場馬，輸咗就有得早啲攞？」

我答：「即係你覺得政府鼓勵moral hazard？」

老竇：「我唔理叫乜呀。如果曾蔭權話70歲、75歲先至有得攞，我冇問題。不過，如果你話有得攞，就唔應該歧視。敬老呀，唔係福利，唔係攞綜援。曾蔭權咁搞，只係會分化香港人，分化香港啲老人家。我哋唔係好需要和諧咩？咁樣點和諧呀？你寫吓問曾蔭權，點解要分化香港人。問吓佢，我哋點樣和諧？」

小弟作為自由市場智庫組織「獅子山學會」嘅研究總監，大家都應該知道我對生果金點睇。不過，最令我估唔到嘅係，除咗2000年立法會選舉之外，我老竇係一個由1985年開始已經次次票投李柱銘嘅人。居然都會覺得「和諧」壓倒一切！