東海油田自由貿易

「冇錯，中方一向好有誠意表明願意共同開發東海油田。問題係，中方只願共同開發日方呢邊嘅油田。中方嗰邊就唔會。」幾年前，孫柏文聽到一名日本官員講嘅說話。

多年嚟都冇進展嘅東海油田開發計劃，有日本傳媒放風，話日本同祖國會好快達成協議，「一齊」開發。我作為一個熱愛和平嘅人，都算安慰。

有個我好相信嘅講法話，人類以前好多戰爭，都係因為一個國家嘅人，冇辦法以非暴力手段，得到另一個國家裏面嘅資源。所以第一個國家嘅人，就會要求政府，或者推好戰者上台，跟住就揮軍去搶。如果啲資源，一開始就係私人擁有，雖然買方係另外一個國家嘅人，兩國政府只要唔介入，買賣雙方能進行你情我願、價高者得嘅交易，就會天下太平。

公平交易可保和平

相信有部份嘅《金手指》fan屎，覺得我信以上「兩國國民自由交易能保和平論」，係好儍、好天真，甚至「自由市場上晒腦」。不過講畀大家知，兩國國民可以自由交易，就係自由貿易。

以上自由貿易保和平論，特別係戰爭必需要嘅戰略物資中有自由貿易，就係歐盟當初建立嘅神髓。歐盟雛形第一條條約，就係保障歐洲六個國家，特別係法國同德國之間嘅煤炭同鋼鐵嘅自由貿易。究竟得唔得？未有條約前嘅100年，德法打仗三次。有條約之後60年就未打過。

他朝希望日本同祖國嘅人，能夠好似德法人民今時今日嘅關係。