胡錦濤介入小圈子競爭？

呢幾日，孫柏文唔知點解總係喺骨子裏覺得，國家主席胡錦濤有介入小圈子競爭。雖然絕對冇公開介入，我就連一啲證據都冇，而同時因今次個「competition」都已經有一個好清晰「欽點」咗嘅「贏家」，所以孫柏文覺得，就算國家主席真係介入，都只係希望個「competition」可以「毫無驚喜」。

大家聽完我講之後，可能會問：「孫柏文，你又喺度講我哋特區嘅特首選舉？好悶啊大佬！唔通你又想《金手指》收視仆直？」有如我哋前特首董建華話齋，大家問得咁膚淺。如果大家有留意新聞報道，胡錦濤主席呢幾日其實喺俄羅斯。而俄羅斯政府又咁啱正在舉行世紀大拍賣，所以孫柏文先至有咁樣嘅感覺。

故事起源，幾年前有間俄羅斯私人石油公司叫做Yukos，間公司係當時俄羅斯最大嘅石油公司，個老闆亦係俄羅斯最有錢嘅富豪。不過，Yukos老闆就好唔聽話咁公開挑戰俄羅斯總統，所以俄羅斯總統決定「對付」佢。大家都知，Yukos老闆可以「玩嘢」嘅原因，係因為佢控制Yukos，所以有財力同總統對抗。只要將Yukos控制權攞走或搶走，個老闆就即刻要就範。

平時一個政府最喜愛搶走市民資產嘅方法，就係通過抽稅，今次亦唔例外。Yukos 接二連三收到稅單，差唔多日日都收到，亦因唔夠現金找數，俄羅斯政府就大條道理咁接管Yukos啲資產。Yukos股東手持嘅股票變牆紙，最後個「玩嘢」老闆亦鋃鐺入獄。Yukos啲股東當然唔開心，抗議到今日。

大家可能會再問：「咁關胡主席乜事？」問得好。故事發展下去，俄羅斯政府知道官僚會管理不善，所以要將Yukos嘅資產民營化。不過就算係民營化，政府都想接管Yukos資產嘅公司聽聽話話，所以就要搵啲「信得過嘅人」。不過，俄羅斯人民經過以前嘅經驗，唔容許再有「數碼港式」嘅利益轉移、官商勾結，要為「資產轉移畀啲信得過嘅人」建立「公平、公開」嘅形象，所以就唔可以送，只可以拍賣。

今次拍賣Yukos資產，已經有間被「欽點」咗嘅公司叫做Rosneft會「贏」，所以好多人相信競投唔會熱烈。俄羅斯政府都知道，如果到時得Rosneft「爭」，冇對手，俄羅斯市民分分鐘會唔服。點知，喺俄羅斯僅有嘅外資石油公司BP英國石油（其他例如ExxonMobil同Shell，已經撤資），就突然宣布會參加呢場拍賣。第一批批評BP嘅人，就當然係Yukos啲股東，有一個直情話BP參與「偽拍賣」，只會令今次小圈子拍賣得到合理化，情況有如長毛梁國雄鬧梁家傑一樣。而我覺得胡主席有介入嘅理由，Yukos就係嗰間原先想起一條油管，由俄羅斯直接輸油去大慶嘅石油公司。

雖然，今時今日計畫擱置，胡主席始終都希望有條新油管，所以如果可以出一點力，令個「拍賣」可以「毫無驚喜」，他朝可能如願以償。不過講起特首選舉，孫柏文都有去「投票」，去咗投模擬選舉票。因為如果真係2012普選特首，就當今次係練習機會！