大摩投降搵人接火棒

呢排有好多fan屎來信問：「孫柏文，你呢排成日都喺度講美國樓市出事，又要講到好似好大鑊，不過究竟關我哋乜事？你睇吓個股市都繼續升啦。」其實，呢班fan屎問嘅問題，都問得好公平。因為花旗國樓市，又真係好似未大規模爆煲。就算爆煲，都未必會波及我哋有祖國支持嘅特區經濟，最後就算特區經濟有影響，因股市已經同本地經濟完全脫節，都真係可以繼續升。

不過，我覺得特區人今日睇花旗國樓市嘅心態，有點似曾相識。真係有少少似97年7、8月嘅時候，我哋特區人眼見泰國出事、泰銖大幅貶值時，滿心歡喜，因為可以去曼谷shopping買平嘢一樣。之後如何，大家心照。

如果大家記得當年，我哋特區曾幾何時有間土產國際級投資銀行，叫做百富勤Peregrine，不過最後執笠收場。而執笠嘅原因，就係百富勤創辦人話：「美國佬成日講『法治』，佢哋知唔知喺亞洲，有權『告人』唔重要，最重要係有『關係guanxi』，咁先至可以搵錢。」

大家可能會話：「呢個邊度係執笠原因，只係百富勤嘅營運原則。」大家咁諗就錯咗，因為百富勤執笠，係佢哋靠「關係」搵到個客，幫個客借錢。原先，幫個客出債券，點知唔夠街客買，所以百富勤要買剩下來、賣唔出嘅債券，而因為自己公司唔夠錢，所以就用自己名義去借錢買呢個客戶嘅債券。

話唔賣轉頭又賣

點知個客因為借美元，但收入係本地貨幣，所以貨幣大幅貶值，就冇美元還。當然，有人借錢唔還，應該可以告佢攞番啲資產都好，不過，因為冇「法治」，個客又有好多本地政治力量，所以唔還就唔還。百富勤因為收唔到美元，所以還唔到錢，最後當然要執笠。其實，花旗國投資銀行Morgan Stanley大摩，都用咗自己錢借畀人去放債做按揭。借咗25億美元畀次按subprime最大嘅獨立公司New Century，New Century就將一批有1.35萬單按揭嘅債券做抵押。

不過New Century出事，呢批按揭債券就畀咗大摩。有好多人當然好關心呢批按揭債券有冇錯出事，所以有人喺3月初問大摩，當時大摩管理層話：「完全冇錯！大家放心！」不過只係過咗幾個禮拜，大摩賣廣告話會舉行拍賣，賣掉呢批按揭債券。可能，大摩唔想步百富勤後塵。不過，究竟要有幾大嘅折扣，先至可以搵人接火棒呢？