獻計畀足總 搞搞特區波

噚日，特區甲組足球聯賽開鑼，傑志對上屆冠軍南華。相信大家多數都冇睇，甚至前晚英超嘅賽果都可背出嚟時，都唔知傑志對南華嗰場波嘅比數。特區足總真係要諗吓計仔，等特區足球作為一件產品可以求存。

要成功錢同人不可缺

其 實，搞好足球同搞個成功嘅party都係一樣，要兩樣嘢：一，錢；二，人。有見及此，今日我想獻一條屎橋畀足總。

大家都知道，足球運動裏最歷史悠久嘅比 賽，就係前宗主國嘅足總杯FA Cup。作為一件可以成功經過時間考驗嘅產品，FA Cup一定有賣點。如果你覺得FA Cup咁多年嚟係賣緊「足球」，咁我就要用隻金手指去篤醒你。FA Cup冇錯係個足球比賽，不過賣嘅係drama。

正當一隊丙組球隊面對曼聯、車路士時，如果你唔係嗰隊波嘅球迷，睇波嘅原因，應該因為想睇吓對弱隊可唔可 以爆冷。前宗主國嘅足總盃，就係充滿呢種「波係圓」嘅浪漫，常常爆冷。而爆冷永遠都係充滿戲劇性，所以先至吸引咁多球迷。所以今日孫柏文建議特區足總應該都搞番個。

如果你懶醒，隻手已經打緊電話嚟《蘋果日報》，想同我講：「香港已經有足總盃啦！」咁我就要問你：「特區嘅足總盃，有幾隊參賽？」特區足總盃只有甲組隊伍可以參賽，即係得8隊，喺咁嘅情況之下，邊有可能有前宗主國足總盃嗰種「爆冷」浪漫？

開放參賽資格搞旺市

所 以，特區足總應該完全開放足總盃參賽資格，男又得、女又得，學生得、長者得，自由行得、從非洲嚟重慶大廈做生意都得。隊波只要喺比賽日擺到11個人出嚟， 攞到數千至萬元參賽費就得。當然，如果有球員已經喺同一屆比賽代表過一隊波參賽，就算轉會，都唔可以再喺嗰屆足總盃踢，呢個叫做cup-tied。

大家諗 吓，搞隊波做班主嘅門檻大跌，應該會有好多人想試。而如果有隊學生隊可以斬顏良、殺文醜咁晉級，你話佢哋啲姨媽姑姐唔會去睇咩？最後，如果足總驚啲甲組球 隊喺首階段「浪費」時間，可以畀佢哋喺16強先加入。點呀，梁孔德主席，有冇得搞？