布殊咳藥水 樓市癌病人

上個禮拜五，花旗國牛仔總統布殊宣佈一系列措施「救樓市」。大家作為《金手指》嘅fan屎，都知孫柏文對 花旗國樓市點睇。舊年都寫過，「將慘過八萬五」。特區政府當年都出過好多招救特區樓市，結果都係冇用。不過既然牛仔總統有措施，我就去睇睇。

一睇，原來牛 仔總統話佢啲措施，將會令八萬個不能轉按嘅斷供戶受惠，佢哋啲樓毋須被債主收回。八萬，大數目，絕對大過早前幾個花旗國州政府成立「救樓市基金」嘅幾千戶 受惠人數。足足多十倍八倍。

冀成幸運八萬人

不過，打後十二個月，將會有二百萬戶需要轉按。如果我係個要轉按嘅花旗國人，真係 想知點樣先可以變成嗰「幸運八萬人」。牛仔總統宣佈嘅措施，有如將咳藥水畀個有肺癌嘅人。有冇用？你哋自己諗。

不過見到花旗國股市上個禮拜五都有升，就等 如股市參與者覺得起碼可以治治標。

講起疾病，花旗國同特區一樣，都被蚊傳播嘅疾病困擾。特區就有登革熱、日本腦炎，花旗國就有西尼羅河病毒West Nile Virus。考考大家，究竟西尼病毒同花旗國樓泡爆破有乜關係？

諗唔到哩。如果睇番97年特區樓市，其中一棟最能代表當年炒樓狂潮嘅大廈，一定係舊山頂道 嘅帝景園。帝景園屬頂級豪宅，當年有人炒燶破產，證明樓泡爆破時，買得豪宅嘅人都可以出事。喺花旗國，絕大部份豪宅都係獨立屋，而有錢人住嘅屋，後花園多 數啲乜？

銀主盤泳池惹蚊

冇錯，就係游泳池。不過因為樓泡爆破，好多有泳池嘅屋被債主收回，冇人住同打理。泳池積聚雨水，爆發 蚊患，多個樓市重災區嘅市政府都要發出西尼病毒警告。試問，如果你住緊嘅屋周邊已經有好多人斷供，佢哋啲屋將會被收回以低價賣出，壓低你間屋嘅樓價，現在 仲要分分鐘中西尼病毒。今次真係銀主兼逢連夜雨。

後記：上個禮拜六，孫柏文見到娛樂版《雙碟記》專欄嘅皇后大盜，用咗小弟「一注獨贏」呢四個字，推介歌手張敬軒嘅新碟《酷愛》。皇后大盜叫得「一注獨贏買張敬軒」，小弟一定去聽聽。