重申一注獨 ……

Insanity。

第一眼望落去，覺得今次伯南克減半厘息，只可以用瘋狂去形容。一係佢就係一個完全唔理會長遠美元購買力嘅中央銀行行長，為求短暫快慰，摧毀美元；如果唔係，佢一定係覺得實際情況比市場預期嚴重好多。即係伯南克覺得（同孫柏文所講一樣），美國樓市仲慘過八萬五。

作為金手指嘅fans都知，孫柏文只淨番兩個有效建議──一注獨贏買白銀同埋一注獨沽賣滙豐。基本上現時投資大方向，一定受中央銀行貨幣政策主宰，正係喺仲未能觸摸到中央銀行方向嘅時代，孫柏文以上兩個建議，係對冲咗嘅投資建議。

點解？因為如果中央銀行濫發鈔票，價值第一時間飆升嘅一定係貴金屬，例如黃金、白銀。上星期美國聯儲局宣佈減息半厘後，黃金白銀嘅走勢有目共睹。至於沽滙豐有乜好？如果中央銀行唔開水喉，最傷嘅一定係銀行業，特別係國際性大銀行，所以就形成咗呢個對冲格局。

黃金白銀低風險

有啲人成日笑啲gold bugs話央行日日濫發鈔票，不過，當St. Louis聯邦儲備局數據顯示，2007年貨幣供應量除咗八月份外，全年都冇增長過，試問冇增長又何來通脹壓力呢？！

再講，試問一種貨品嘅供應量冇增加，但突然有人揮揮魔術棒就減到價，唯一解釋就係，有啲肯出高價嘅人都冇賣家肯賣貨畀佢。喺資本市場，肯出高利息去借錢嘅人，等於高風險客戶；喺新世代入面，高風險嘅人借唔到錢；高風險嘅投資項目亦都吸引唔到資金。

大家一定會問，咁即係現金冇風險？因為cash is King！大家咁諗，唔錯得晒，但諷刺嘅地方，就係睇美滙指數，美元已經跌到二次大戰後新低，所以美元風險可以話數一數二，而美元債券亦都變相大風險。當美元都有風險嘅時候，作為金手指fans，應該知最冇風險嘅就係黃金同白銀，所以，繼續一注獨贏買白銀！

次按風暴未打完

講完白銀同黃金，梗係要講吓滙豐。

滙豐（005）宣佈要將佢旗下Decision One次按公司結業，好多人以為此舉已將滙豐嘅噩夢畫上句號，不過，有如blogger「會計仔」喺小弟個blog上留言，其實滙豐仲有九百幾億美金嘅美國次按喺手。

如果以股票嚟舉例，現在有如滙豐旗下有間股票行，因為呢排生意唔好，所以結業、裁員。問題係，滙豐呢兩年經嗰間股票行買咗九百億有問題股票。滙豐次按風暴已完？其實仲有排打。