講你知「資金自由行」何時來

「資金自由行」呢五個字，真係令人又愛又恨。呢排股市上升嘅動力，全靠佢。不過作為特區股民，同時令我哋等到pissed off，令我哋個個變晒坐緊長途車嘅外 國小朋友咁，係咁問：「到未呀？到未呀！到未呀呀呀！」

噚日，仲有個粉蛋記者走去問中行李禮輝，資金自由行計劃係咪擱淺，搞到輝叔話「資金自由行未擱 淺」。雖然有個「未」字，不過同一句說話有「資金自由行」同「擱淺」，股民一旦聽唔清楚，恒指分分鐘跌你四五千點，等你仲咁開心日日炒港交所（388）。

阿媽唔畀買

冇錯，孫柏文酸 溜溜嘅原因，係因為冇份炒港交所，我仲係「一注獨沽賣滙豐」。不過講真，如果要估點解中央仲未畀啲資金自由咁行嚟特區，可以有百幾二百個理由。今日就為大 家提供一個。

如果要估中央嘅下一步，大家就要代入角色，擁有做父母嘅思維。中央就係阿媽，祖國散戶就係啲成個袋都係利是錢嘅小朋友。今時今日，啲小朋友係 咁嘈話要買玩具，作為阿媽都已經預咗佢哋去到玩具店會亂嚟。不過，阿媽都希望啲小朋友就算亂嚟，都盡量減低輸錢嘅機會。

即係點解？不如掉番轉頭講。孫柏文記 得，年初同曾淵滄教授做投資講座，嗰排啱啱遇上有外國投資銀行，例如高盛，高姿態唱淡祖國股市，A股三千點時話係「巨大泡沫」。曾教授解釋，因為啲外國投 資銀行想買A股，不過想買平貨，所以大力唱淡，希望大跌，執平貨。亦因中央唔笨，所以一定唔會篤爆泡沫，唔會賤賣資產。

明燈救散戶

同 一道理，中央如果畀祖國散戶出嚟買嘢，絕對唔希望佢哋接火棒。中央仲要自己本身都上咗「黑石」同「巴克萊」呢兩條賊船，清楚明白信貸危機令股市岌岌可危、 驚濤駭浪。所以，用曾教授嘅邏輯，我覺得中央要等到股市大跌之後，先至放啲散戶落嚟，因為到時通街平貨。

當然，有我呢個明燈做一個咁樣嘅預測，就等如今晚 收市後，中央就會即刻落實推行「資金自由行」政策。哈、哈！