Northern Rock賣的紙上白銀

1997年暑假，孫柏文當時日日企喺銀行㩒股票機，同啲師奶一齊搏殺。我記得有個因為開始發生金融風暴，所以對當年股市睇得好淡嘅師奶股神。睇得淡，覺得會大跌嘅佢，當然唔會紙上談兵，所以就喺當年嘅8月開始，大手、大手買年尾到期嘅恒指認沽證。到當年10月股災都仲喺手。

大家可能會問：「咁佢咪贏好多？」應該就係，不過最弊佢買嘅恒指認沽證，係百富出嘅。大家都應該記得，投資銀行百富97年倒閉，嗰位師奶股神後尾有冇錢收，我都唔清楚。

慘。

驚冇錢收要割禾青

今年年初，花旗國次按開始爆破，次按債券價格開始下跌。任何嘢嘅價格有大變動，就自然會有贏家同輸家。原來，有間對冲基金買咗好多類似次按債券認沽證嘅嘢，次按債券價格下跌，啲認沽證當然係咁升，嗰間對冲基金當然贏大錢。

最近，嗰間對冲基金嘅話事人接受傳媒訪問。問到佢覺得次按問題仲要搞幾耐，佢用咗棒球術語still in the early innings。咁因為知道我哋特區人唔識棒球，所以我就繙譯成足球術語──佢話次按問題仲喺場波上半場30分鐘。

不過，個基金嘅話事人又話，佢哋已經開始割禾青，將手上嘅次按債券認沽證賣出。大家可能會問：「咁又話喺場波上半場30分鐘？係咪唔信自己嘅預測？」

咁記者當然有問，其實，個話事人解釋，佢哋覺得次按同樓市爆破，問題會非常嚴重。嚴重程度會到達就連出認沽證嘅金融機構，都會出事，為免好似以上嗰位師奶股神咁，睇中都驚冇錢收，所以開始割禾青。

買銀一定要買實貨

今日講咁多「睇中冇錢收」嘅故事，係因為自從聯儲局喺上個禮拜減息之後，好多《金手指》fan屎又對白銀產生興趣，問我點買白銀。我當然叫佢哋買實貨白銀，不過就有fan屎話，喺銀行開戶買紙上白銀會方便啲。方便就係方便，不過如果你嗰間銀行係Northern Rock咁點算？

前宗主國銀行Northern Rock面對擠提潮，如果你啲紙上白銀係同佢哋買，你會唔會驚？當今世上，喺投機買賣當中，冇乜嘢比「睇中冇錢收」更痛苦，所以最後奉勸大家一句，為咗瞓得着覺，買銀，一定要買實貨白銀。