伯南克點睇美滙走勢

花旗國國會裏面，有個國會議員叫Ron Paul。佢同孫柏文一樣，都係金銀信徒，絕對自由派。甚至可以話比我更堅定、hard core。佢相信聯儲局為首嘅紙幣狂魔，最終會摧毀美元購買力，令唔識玩財技、慢慢儲錢嘅花旗國老百姓被劫。

更令識玩財技嘅人，被迫參與炒賣活動，因為喺美元購買力不斷被削弱嘅世界裏面，唔走去借錢進行投機活動，唔借錢去盲目投資，就只有死路一條。

放心沽美元

上個禮拜，聯儲局減息之後，聯儲局主席伯南克走咗去國會，接受議員問話。其中一個有份去質伯南克嘅議員，就係Ron Paul（我已經將呢段對答放上我嘅blog度，你哋自己去睇睇）。

輪到Ron Paul發言時，佢就好似一個典型白銀戰隊隊員，係咁鬧聯儲局濫發鈔票，令美元滙價每況愈下，更令石油、食物、原材料價格上升。

不過，就算拳拳到肉，因為始終都係個問話，Ron Paul鬧完之後，就問咗條問題作結。Ron Paul：「道德上，令美元價值大貶，係啱定係唔啱？」
伯南克答：「美元價值對我嚟講，就等於美元喺花旗國本土嘅購買力，亦即係通脹率。通脹率仲受控，而聯儲局會繼續專注留意通脹率。」

即係點解？伯南克喺答案中，基本上話：「美滙跌到仆直都冇問題！沽美元啦！」大家可能會問：「咁通脹率失控嘅話又點算？」如果你咁問，我就要用隻金手指篤醒你，因為石油、食物、原材料根本唔喺聯儲局留意嘅「核心」通脹率裏面。「核心」通脹率就係CPI ex inflation，所以一定冇事。大家放心沽美元啦！