用黃金做套息交易

套息交易carry trade，相信大家作為《金手指》嘅fan屎，都應該知道係乜。就係一位投資者，借利息低嘅貨幣，跟住買啲利息、回報比較高嘅資產。例如，用一厘利息借日圓，跟住買每年有4.5厘嘅三十年花旗國國庫債券。如果日圓兌美元滙價唔變，每借一百萬，就做都唔使做，可以每年賺3.5萬。所以，大家明白點解咁多人做套息交易。

其實，除咗日圓同瑞士法郎呢啲低息貨幣之外，其中一個好多人喜歡借嚟做套息交易嘅「低息貨幣」，就係黃金。唔明？好，慢慢解釋。

借出去收息慳租

好多時，孫柏文喺街見到fan屎，你哋都會話：「買黃金、白銀冇息收喎。」而各國「聰明絕頂」嘅中央銀行，多年來都同意呢個睇法。佢哋手上有好多黃金，不過，如果將黃金擺喺金庫，佢哋覺得「好嘥」，因為冇息收。所以，佢哋就「聰明絕頂」咁，將黃金借出去，收一厘利息，連倉租都慳埋。借呢啲黃金嘅人，就會將黃金賣出，跟住買啲回報較高嘅資產。

最厲害係，各國中央銀行嘅金庫，可能已經空空如也，將黃金借晒出去。不過因為喺「紙上」仲係啲黃金嘅「物主」，所以仲可以對住全世界，喺年報大大聲話自己有幾多、幾多噸黃金。啱啱講過，做套息交易要賺，借番嚟嘅貨幣就絕對唔可以升。因為個交易每年先至賺幾厘，借番嚟嘅貨幣升幾個百分點，你已經可以輸凸。

隨時升到嚇死人

正當個個做套息交易嘅人，都好驚借番嚟嘅貨幣升，所以每一次真係會升時，個個就好似驚弓之鳥，一齊以最快時間賣資產，買番借咗嘅貨幣。呢個就係點解套息交易拆倉，日圓就會急升。睇番黃金，呢排走勢強勁，唔知借咗黃金做套息交易嘅人，幾時會驚？幾時拆倉？

唔同日圓呢啲央行長印長有嘅紙幣，黃金拆倉，就真係要搶，或者掘先至有。

到時，仲唔升到嚇死人？